الأربعاء، مارس 02، 2011

التعلب فات








غزلت  شال لأمي جديد
من تلت ألوان
أحمر بلون دم الشهيد
أبيض بلون قلب الوليد
أسود بلون الليل البعيد
جيت أزينه على كتافها
غضبت مني
ولفت بعيد عني
قالتلي  فات الأوان
أنا قلبي وجعني
مالك يا مه اشتكي
دا أنا أموت
لو قلبك في يوم بـِكـِي
قولي يامه معدش خلاص  سكات
أولادك رجعولك
والتعلب فات والله فات
فات يا مه
 وفي ديله شقى الأولاد
فات يا مه  وفات الندم
على عمر عدى
في ذل وألم
فات يا مه  بعد ما عدم
آمال ياما وداس عليها بالقدم
فات بعد ماحنى
 ضهور تشقى لأجل الضنى
في ساقية متغمية
شافوا يا مه  بعنيهم العمى
فات وفي ايده خيرك
وربك قادر يعيده ويجيرك
آه يا مة والنعمة فات
بعد ماكان ملجمنا
 فوقنا خلاص
قمنا اتكلمنا
ما إحنا بجد تعبنا
كسرنا حاجز الخوف
هدينا جدار الجبن
والله  بإيدنا
فات يا مه
ومن النهاردة
من  الغربال لازم نشوف
ونعرف اللي في القلب
قبل الوشوش
ونبطل عمى وتحسيس بالكفوف
وكمان يامه
بطلنا نمشي جنب الحيط
ونتخفى وندارى  زي  الوطاويط
ما الدنيا سمعتنا بدال  أبو الغيط
خلاص يامه معدش فينا عبيط
فات  يامه
والله فات
وهاياخد وراه كل الآفات
اللي قتل واللي نهب
واللي شيلك الحمل وطلعلك أتب
كله كله برة العتب
ما خلاص يامه بطلنا سكات
وصوتنا لازم ينجلي
والله  هاتتعدل  بس اجمدي
استحملي
فات الكتير  واللي جاي
ولادك  له وليك   حراس
ولادك شايلينك  يا مه فوق الراس
وكرامتك ولا يوم تاني هاتنداس
يالا يامه إلبسي توب العز
ولفيه عليك
واوعي في يوم تاني تتغيري
تلفي عني وتتدوري
دا أنت يامه تشاوري بس تؤمري
أؤمري







هناك 16 تعليقًا:

فارسة بلا جواد يقول...

رائعه

وجميله الخاطرة فيها الوطن والأم والأولاد تجمعوا معنا جميل نفتقده


ضلي على الدوام لعل وعسى يصحى هذا المعنى من غفلته

مرسي الك

سكن الليل يقول...

خاطرة جميلة
سطرت بحروف من إبداع..كللتها الكرامة
حروف متراقصة على نغم الانتصار
افرحي ياأما
الورد فتح في الجناين
والشمس طالة على الجبين
نسايم الحرية طالعة من صدور ولادك
ولادك اللي بذلوا أرواحهم عشان ما تبكيش
ولا يلمحو في عنيكي دمعة
ولادك اللي لما النصر رفع الرايات
دقوا أجراس العمل
نفضوا التوب من الملل
كسروا كل الحواجز
شالوا السلاح..قلم..فاس..ترس داير
آن الأوان تفرحي يا غالية
ربيتي وكبرتي
مهما كان في ظلم قمتي وما انكسرتي
آن الأوان نفرح كلنا
ونغني للنصر الغناوي
يحلا الغنى والصنايعية بيشتغلوا
تحلا الدندنة والبنايين بيعلوا
****
استمتعت بمروري هنا
وردة ربيع تعطر سما دنيتك

مصطفى سيف يقول...

واي دماء ازكى من دماء الشهداء؟
رحم الله شهدائنا لولا تضحياتهم لما تنفسنا الحرية
تحياتي لابداعك الرائع واحساسك الوطني
ابدعتي حقا في وصف احاسيسنا

om elwlad يقول...

بكيت وأنا أقرأ مدونتك الرائعة وكلامها المعبر .. حسيت إنى أنا وكل أم هى المقصودة بهذا الكلام وليست أمنا كلنا .. أنا فعلا قلبى واجعنى ..
حقيقى انا سعيدة بيكى

محمد الجرايحى يقول...

الكلمات رائعة ..والمعنى أروع
أحييك بشدة

تقبلى مرورى وتقديرى واحترامى
بارك الله فيك وأعزك

ماما أمولة يقول...

فارسة بلا جواد
أهلا بك حبيبتي نورتي الزمن الجميل
أشكرك لكلماتك الطيبة
دمت بكل الخيل

ماما أمولة يقول...

سكن الليل
فاح عطر الزهور بكلماتك الرائعة
أشكرك لتفاعلك الجميل
واتمنى دوام التواصل
دمت بود

ماما أمولة يقول...

مصطفى سيف
نعم لولا دماء الشهداء الزكية لما تنفسنا نسائم الحرية
تقديري لك ولمرورك الطيب
أشكرك

ماما أمولة يقول...

om elwlad
أم الولاد الطيبة التي أحببتها في الله من أول حرف
يا صاحبة القلب الحي سلم قلبك وعمرك اللهم امين
أنا من سعدت بك أسعدك الله وأعزك

ماما أمولة يقول...

أخي محمد الجرايحي
حياك الله وأنعم عليك بكل الخير
كل التقدير والاحترام لحضرتك

♥نبع الغرام♥♪≈ يقول...

الله عليكى وعلى تشبيهاتك الاكتر من رائعه اختى الحبيبه

يارب يحميكى يا ام الدنيا ويعلى من شأنك

كلماتك مؤلمه ووجعتنى

ماما أمولة يقول...

نبع الغرام
ربنا يخليك يا رب يا نوسة
يارب يحمي مصر وكل الوطن الغالي
سلامتك يارب من كل شر حبيبتي

جايدا العزيزي يقول...

ما اجمل تعبيرك غاليتى

وما اروع احساسك المرهف

دمت دائما متالقه

تحياتى

شمس النهار يقول...

فعلا التعلب فات واخد في ديله الكلاب

تسلم ايدك ياماما اموله

دايما جايبه من نبع الكلام الجميل الصافي

ربنا يكرمك

ماما أمولة يقول...

جايدا العزيزي
ربنا يبارك فيك حبيبتي
شكرا

ماما أمولة يقول...

شمس النهار
شموسة أختي الغالية
الله يسلم عمرك يارب
شكرا لك حبيبتي