الجمعة، ديسمبر 30، 2011

أماليات 16




ورقة ومداد وقلم
احساس بيتكتب
يمكن فرحة
يمكن ألم
يمكن رعشة خوف اتكتم
يمكن همسة
يمكن رسمة
يمكن شخبطة
على حب اتهدم
يمكن احساس 
اتخلق من عدم
يمكن ويمكن
لكن مين يعرف 
سر جرة القلم .


مستغرباني









مستغرباني
هي أنا
ولا حد تاني
مستغرباني
نفس الاحساس
نفس المشاعر
نفس العيون
نفس الشبه
بس برضه
تصدقوا
مش عارفاني
مستغرباني
يا طريق ليه خالفتني
ضيعت مني خطوتي
لا عارفة أرجع
ولا عارفة أمد
توهتني
خلتني أتوه ويا الدروووب
مش لقياني
مستغرباني
جوايا خوووف
حتى الحروف
معانداني
مش مطاوعاني
مستغرباني



السبت، ديسمبر 24، 2011

أماليات 15





يا ورد
أوعى الشوق 
يخليك تبوح 
تخليني طير
عايش مدبوح
دا أنا عمري
من غيرك أنوح
ولا يملى روحي
بعدك روح
أنت الورد
عطره بقلبي يفوح
وأنت الوله
مهما آجي ولا أروح
عشقك عمري
يملا السما والسفوح




الخميس، ديسمبر 22، 2011

سؤال مالوش لازمة ؟؟؟








هي السعادة بتتشرى
ولا إيه
ولا لسه مجاش أوانها
ولا جفت على أغصانها
ولا راح زمانها
مدورش عليه
خايفة يسكني الحزن تاني
أدور على أمل ما ألقاني
ولا أنسى
ولا أعمل إيه
عارفة إنه سؤال صعب
ميتجاوبش عليه
وأنا بسأل
ولازمة سؤالي إيه
لكن أنا عارفة جوابه
وعارفة سكته وبابه
وعارفة كلمة السر إيه
يارب