في سكتنا
ناس كتير بتقابلنا
من غير ماتقابلنا
ناس بتأثر بكلمة فينا
وناس بنأثر بطبيتنا فيها
وناس
خسارة الكلام ليها
وناس بكت العين عليها
وناس بكت العين منها
وناس زي مرايتنا
بنعشق فيها تفاصيلنا
وناس بتنور بقلوبها ليلنا
هي قمرنا في غربة خطاوينا
وناس بتعدي
ولا نحس بيها
وناس بتهدي
وتربط على مراسينا
وناس حاسة بينا
وناس حاسة بيها فينا
وناس بتنسى ناس
وناس بتقسى على ناس
وناس تجافي الحب فينا
وناس تحب الحب لينا
وناس في البعد أحلى
وناس في القرب وحلة
وناس مش ناس
بتدوس على قلوب الناس
وناس بتداوي جرح ناس
وناس بتفرح بجرح ناس
وناس منها تعبنا
وناس ليه بتعاتبنا
وناس تشكي ناس
وناس تشكي مر الكاس
وناس وناس كتير
بنقابلها في سكتنا
تعبتنا
هناك 10 تعليقات:
أحلى حاجة في اللي انت كتبتيه التوازن بين المشاعر المتناقضة ، بين المدح و الذم.
بس فين يوتيوبياتك أستاذتنا :)))
مستنيها على اليوتيوب
وناس في البعد أحلى
وناس في القرب وحلة
تحياتى لحضرتك
انا علقوا جاامد ف نافوخى الشطرين دووول
السلام عليكم
مامتي أمولة
بتعبري حضرتك عن اللي جواية بالضبط
بس طبعا بمنتهي الروعة والابداع بكلماتك المعبرة جدا
علي فكرة أنا بعدت شوية عن المدونة وعالم التدوين لفترة أرجو الا تطول بس بتابع بقلة جدا لكن لما جيت عند مامتي وقرأت هذا الابداع قلت لازم أعلق وأدعيلك ربنا يحفظك
دمتي بكل خير بس متنسيش تدعيلي
دائما لازمن الجميل يتحفنا بالكلمات الجميله ودائما قلمك يبدع دمتى دائما متالقه تقبلى تحياتى الاحـــــلام
محمد محمود عمارة
لازم التوازن والا يبقى عدم انصاف للطرف الآخر :)
بجهز يوتيوب وها ابعته لك هناك :))
نورت يا أ / محمد
ENG./ELSAYED,PMP
دي حقيقة يا باشمهندس وأكترنا لمسها ان في ناس زي القمر ينورلك طول ما هو بعيد ولو قربلك تلاقيه صخر وجبال وقلته أحسن :)
تقديري لمرورك
ابن النيل
ربنا يصلح حالك ويبارك لك في عمرك يارب ابني الغالي
يارب تكون بخير والغيبة مطولش
شكرا لمرورك الطيب
الاحلام
شكرا لك يا صاحب الأحلام
عطرت مدونتي بمرورك وكلماتك الطيبة
دمت بكل الخير يارب
السلام عليكم
تحياتى
انت قلتى على كل الناس ما فاضلش ناس ما قلتيش عليهم
وزمان قال عبد الحليم حافظ
على طول الحياه
نقابل ناس
ونعرف ناس
وفى النهايه
يمكن ننسى كل الناس
الا حبايبنا
تحياتى
فشكووول يا أعز الناس
دايما يارب تنور الزمن الجميل بقلبك الجميل
دمت بكل الخير يارب
إرسال تعليق