الأحد، يونيو 05، 2011

في سكتنا







في سكتنا 

ناس  كتير بتقابلنا

 من غير ماتقابلنا

ناس بتأثر بكلمة فينا 

وناس بنأثر بطبيتنا فيها

وناس 

خسارة الكلام ليها 

وناس بكت العين عليها

وناس بكت العين منها

وناس زي مرايتنا 

 بنعشق فيها تفاصيلنا

 وناس بتنور بقلوبها ليلنا

هي قمرنا في غربة خطاوينا

وناس بتعدي 

ولا نحس بيها 

وناس بتهدي 

وتربط على مراسينا

 وناس حاسة بينا 

وناس حاسة بيها فينا 

وناس بتنسى ناس

وناس بتقسى على ناس

وناس تجافي الحب فينا 

وناس تحب الحب لينا

وناس في البعد أحلى 

وناس في القرب وحلة

وناس مش ناس 

بتدوس على قلوب الناس

وناس بتداوي جرح ناس

وناس بتفرح بجرح ناس

وناس منها تعبنا

وناس ليه بتعاتبنا

وناس تشكي ناس 

وناس تشكي مر الكاس

وناس وناس كتير

بنقابلها في سكتنا

تعبتنا





هناك 10 تعليقات:

محمد محمود عمارة يقول...

أحلى حاجة في اللي انت كتبتيه التوازن بين المشاعر المتناقضة ، بين المدح و الذم.
بس فين يوتيوبياتك أستاذتنا :)))
مستنيها على اليوتيوب

ENG./ELSAYED,PMP يقول...

وناس في البعد أحلى

وناس في القرب وحلة

تحياتى لحضرتك
انا علقوا جاامد ف نافوخى الشطرين دووول

إبن النيل يقول...

السلام عليكم
مامتي أمولة
بتعبري حضرتك عن اللي جواية بالضبط
بس طبعا بمنتهي الروعة والابداع بكلماتك المعبرة جدا
علي فكرة أنا بعدت شوية عن المدونة وعالم التدوين لفترة أرجو الا تطول بس بتابع بقلة جدا لكن لما جيت عند مامتي وقرأت هذا الابداع قلت لازم أعلق وأدعيلك ربنا يحفظك

دمتي بكل خير بس متنسيش تدعيلي

الاحلام يقول...

دائما لازمن الجميل يتحفنا بالكلمات الجميله ودائما قلمك يبدع دمتى دائما متالقه تقبلى تحياتى الاحـــــلام

ماما أمولة يقول...

محمد محمود عمارة
لازم التوازن والا يبقى عدم انصاف للطرف الآخر :)
بجهز يوتيوب وها ابعته لك هناك :))

نورت يا أ / محمد

ماما أمولة يقول...

ENG./ELSAYED,PMP
دي حقيقة يا باشمهندس وأكترنا لمسها ان في ناس زي القمر ينورلك طول ما هو بعيد ولو قربلك تلاقيه صخر وجبال وقلته أحسن :)

تقديري لمرورك

ماما أمولة يقول...

ابن النيل
ربنا يصلح حالك ويبارك لك في عمرك يارب ابني الغالي
يارب تكون بخير والغيبة مطولش
شكرا لمرورك الطيب

ماما أمولة يقول...

الاحلام
شكرا لك يا صاحب الأحلام
عطرت مدونتي بمرورك وكلماتك الطيبة
دمت بكل الخير يارب

فشكووول يقول...

السلام عليكم
تحياتى
انت قلتى على كل الناس ما فاضلش ناس ما قلتيش عليهم
وزمان قال عبد الحليم حافظ
على طول الحياه
نقابل ناس
ونعرف ناس
وفى النهايه
يمكن ننسى كل الناس
الا حبايبنا
تحياتى

ماما أمولة يقول...

فشكووول يا أعز الناس
دايما يارب تنور الزمن الجميل بقلبك الجميل

دمت بكل الخير يارب