الاثنين، يوليو 13، 2009

مالَك في إيه




مالَك في إيه
لو مش عوايدي
اسألني قلي مالِك في إيه
طبطب عليه
قلي مالِك مزعلِك إيه
لو مش بإيدك ها طبطب
طبطب بكلمة طيبة ولو قليلة
يمكن أنسى اللي أنا فيه
مالَك في إيه
****
الدنيا لهتك عني وغربتك
طب قلي مالَك انت فيك ايه
انفض غبار السنين عن قلبك
نسّيه القسى وكل اللي مر عليه
خلينا نعيش أيامنا صُحبة
تسند عليّه واسند علِيك
بس قلي مالَك في ايه
****
مش عارف أنا !!!
يمكن أكون بقيت غريب
والله محتاج لكل إيد
تلسم جراحى بكلمة ببسمة
يمكن قلبى يطيب
أنا فعلا محتاج لك ياطبيب
____

هناك 60 تعليقًا:

همس الاحباب يقول...

الله
روعة جدا يا ماما
كلمات بسيطه جدا
تحمل كل المعانى
تسلم ابداعاتك بجد
تحياتى

همس الاحباب يقول...

ايه ده كماان اول تعليق
ايه اللى بيحصل ده
ده يوم حظ النهاردة ولا ايه
بس النهاردة 13
جايز

ماما أمولة يقول...

ههههههههه

ازيك يا ابو همس

13 دي اشاعة اكيد

شكرا لمرورك الجميل

دمت بكل الخير يارب

مجداوية يقول...

السلام عليكم

أولا جزاك الله كل خير على تنويهك لمقالة فاروق جويدة فخالص شكري وامتناني

ثانيا
أى حد لو حتسأليه السؤال ده قلي مالك فيك ايه ممكن لو اتكلم مش حيسكت لأن القلب بيكون مليان ولو عاتبتي حد بيطلعك محقوقة ومحدش بيعترف بغلطه فعشان كده الشكوى لغير الله مذله لكن الاهتمام بالسؤال بيرقق القلب وبيطبطب حتى لو مقالش فيه ايه,,متبطليش طبطبة للي يهمك أمره بس

قلم رصاص يقول...

السلام عليكم

كلمات رائعة ماما اموله

بارك الله فيكي

دمتي في حفظ الله

أحــوال الهـوي يقول...

السؤال المتكرر و الاجابات المتباينه

سؤال واحد يستعرض حياة كاملة بكل ما فيها من امل و الم و دعوة جميلة و مبادرة لجعل المستقبل امثر اشراقا


تتحدثين ببساطة عن معضلة كل بيت اصابه الفتور

تحياتي

ماما أمولة يقول...

اختي الحبيبة مجداوية

وعليكم السلام ورحمة الله وبركاته

اولا حبيبتي لاشكر على واجب

اما عن كلماتي

ففعلا هي لمن يهمني امره او اهمه في امري

فهذا ليس عتاب ولكن محاولة لنفض الغبار

الذي قد يتراكم غصبا عنا

شكرا لمرورك غاليتي جزاك الله كل الخير

ماما أمولة يقول...

اخي الفاضل / احوال الهوى

فعلا أخي لقد قرأت معاني الكلمات

فهذه الكلمات البسيطة قد تقتل الفتور

وتعيد الحياة الجميلة

بس ازاي تتقال ؟

أكيد بالحب والطبطبة

تقديري

أبو كريم يقول...

مالك فى إيه؟ سؤال أجاب عليه أحمد مطر


ما تهمتي؟

تهمتك العروبة

قلت لكم ما تهمتي؟

قلنا لك العروبة.

يا ناس قولوا غيرها.

أسألكم عن تهمتي..

ليس عن العقوبة

ماما أمولة يقول...

قلم رصاص

وعليكم السلام ورحمة الله وبركاته

شكرا ابني الغالي

وبارك الله فيك اللهم امين

دمت بحفظ الله

ماما أمولة يقول...

اهلا يا ابو كريم

نورت المدونة

كلمات جميلة

ولكن هل العروبة الآن عقوبة؟

دمت بخير

ماما أمولة يقول...

khalidkhalid

شكرا لمرورك الجميل وكلماتك الاجمل

تقديري

موناليزا يقول...

السؤال ده عموما لو اتقال بطريقة مباشرة بيضايق وخاصة لو اللى قدامك بطبعه بيحب الصمت
بصى انتِ قوليه بطريق غير مباشر بعد الاستدراج فى الحديث:)

mahasen saber يقول...

ده احلى عتاب لصديق ممكن يتقال

انا حسيتها كدا

ازى حضرتك يا ماما اموله
وازاى امانى

يا رب تكونوا بافضل حال

ادم المصرى يقول...

كلمات جميله جدا وخفيفه ومفهومها بسيط ورائع

مرسى جدا ماما اوموله على كلماتك

الجميله

mohamed ghalia يقول...

ربنا يكرمك ويسعدك دايما ياماما
جميلة الكلمات يا أمى
دمتِ فى سعادة

شمس النهار يقول...

ياه
مشاعر جميله
وطلب عادل
كلنا محتاجينه
تسلم ايدك

ومين مش محتاج طبطبه

ahmed_k يقول...

ما شاء الله أيه الكلمات الرقيقه دي
يا أختي نحن البشر نأنس لبعضنا البعض
فلا يستطيع أحد منا أن يعيش بمفرده ولو ملك أطنانا من الذهب والفضه
فأنسنا لبعضنا البعض يفف الكثير عنا من الهموم والآلام
وفقك الله لكل خير
تقبلي تحياتي

بحب كل الناس يقول...

جميل جدا جدااااااا

يا ماما امولة و تسلم ايد حضرتك

تقبلى مرورى

ABOALI يقول...

خايف اقول ليكى على اللى فيا
ازود عليكى الهموم وانتى كل اللى ليا
باشوف فى عينك كل يوم سؤالك عنى
وعارف انك حاسة بكل اللى فيا
وقلبك دايما بيقول هو ماله
هووووووووووووووو فيه ايه
بس صديقنى كل ده من حبى ليكى
جايز اكون فاهم الحب غلط
ومحتاج دورس كتيرة ومحو امية
بس ابويا زمان قال لى
شيل حملك وامشى بيه
خليك راجل وربنا هايفرج عليك
اوعاك فى يوم تشكى همك
اللى خلقك فوق هو اللى عارفك
امشى راسك مرفوع
والبسمة فى وشك بتتضحك منها الضلوع
عاااااااااااارف
انك سندى وحياتى
منك انا وانتى منى
وربنا خلقنا اتنين
سكن ومودة بس لينا روحين
لكن وعد منى
هابدء من جديد
وهاشارك معاكى فرحى وهمى
وعمرك ما هاتقولى تانى
مالك فيه ايه



الحقيقة كلماتك يا ست الكل رائعة
وكلها معانى اسرية مميزة

باحييكى على الانتقاء المميز

ودايما فى نجاح

ومالك فيه ايه



تحياتى

ماما أمولة يقول...

موناليزا

ماشي

بس السؤال دا يتقال بحب أفضل

وفي الوقت المناسب

شكرا لمرورك الغالي

دمت بود

ماما أمولة يقول...

mahasen saber

ازيك يا حبيبتي عاملة ايه يارب تكوني بخير

انا بخير والحمد لله

شكرا لمرورك الجميل

دمت بود

ماما أمولة يقول...

شمس النهار

شموسة ازيك يا حبيبتي

فعلا طلب عادل كلنا محتاجينه

كلنا نطبطب على بعض بحب وبصدق

شكرا يا شموسة على زيارتك الجميلة

نورت المدونة

ماما أمولة يقول...

ahmed_k

نعم أنسنا ببعض قد يزيل جبال من الهموم

شكرا اخي الكريم على زيارتك وتعليقك الرائع

دمت بحفظ الله

ماما أمولة يقول...

بحب كل الناس

شكرا

الله يسلمك يارب

ماما أمولة يقول...

mohamed ghalia

ابني الغالي

ما أجمل كلمة امي منك

ربنا يبارك فيك

وشكرا لمرورك العطر

ماما أمولة يقول...

ادم المصرى

الشكر لك يا آدم لكلماتك الجميلة

دمت بكل الخير

ماما أمولة يقول...

ابو علي الغالي

كلماتي انا اللي رائعة

طب ارد على كلماتك بإيه

ما شاء الله عليك وعلى تفاعلك بالكلمات

ربنا يزيدك من فضله اللهم امين

شكرا لمرورك الذي يضيف لي

دمت بكل الخير

مافيش حاجة الحمد لله

بحـــر الدموع يقول...

السلام عليكمـ

ماما أمولة .

شو أخبارك .؟ أسأل الله ان ينعم عليك بالصحة والعافية الدائمة


كلمات جميلة بألفاظها ومعانيها
جعلها الله في ميزان حسناتك

جنّي يقول...

السلام عليكم

كلماتك جميلة قوي

قال أبو هريرة عن النبي صلى الله عليه وسلم الكلمة الطيبة صدقة .. البخاري

فبكلمة طيبة نفتح القلوب وبالسؤال الحسن نمتلكها ..

تحيتي

واحد من العمال يقول...

السلام عليكم

جمال كلماتك وسبب الشعور الفورى بها

هو فى بساطتها المفرطه

وكيف حال أمانى

سلامى لها

ودمتِ فى أمان الله

عالم حبيب يقول...

كلمات جميلة ما شاء الله

أحيانا فعلا بنحتاج ان حد يقولنا مالك في ايه .. بنبقى عاوزين نتكلم بس للأسف ما بنلاقيش حد يسمعنا ... خصوصا في الغربة :(

حلم بيعافر يقول...

لما قلت مرة مالى وايه اللى جوايا بصراحة زعلت ومشيت
ساعات اللى بيبقى جوه الواحد بيزعل اللى حواليه
ولما الواحد بيبقى كاتم ومش راضى يقول جحاجة وباين عليه الزعل بيبقى كاتم عشان خايف يقول حاجة تخسره حد
تقبلى مرورى

ماما أمولة يقول...

بحـــر الدموع

وعليكم السلام

الحمد لله انا بخير

شكرا لمرورك الغالي

دمت بحفظ الله

ماما أمولة يقول...

جنّي

وعليكم السلام ورحمة الله وبركاته

نعم بالكلمة طيبة نفتح القلوب وبالسؤال الحسن نمتلكها ..

شكرا لمرورك الطيب

دمت بحفظ الله

ماما أمولة يقول...

واحد من العمال

وعليكم السلام ورحمة الله وبركاته

شكرا لاطرائك الطيب

جزاك الله خيرا

اماني بخير والحمد لله وبدئت تمشي

شكرا لسؤالك

دمت بحفظ الله

ماما أمولة يقول...

عالم حبيب

شكرا لمرورك الجميل

ربنا معاك يخفف عنك غربتك ان شاء الله

دمت بحفظ الله

ماما أمولة يقول...

حلم بيعافر

فكرتني بأغنية عبد الوهاب

خايف اقول اللي في قلبي تزعل وتعند وياية

صدقني الصمت بيزيد المسافات

اجمل حاجة الصراحة حتى لو ها تزعل

القلوب لو صادقة هاترجع تروق من تاني

ولو ها نخسر هانكون كسبنا أنفسنا

نورت الزمن الجميل

دمت بخير

فشكووول يقول...

ماما اموله هانم العسوله
السلام عليكم
مالى على الله يا سيدتى
الحمد لله رب العالمين
اشم رائحة شجن يطل برأسه من احساسك
ربنا يبعد عنك الهم والكرب
كونى دائما النسمه الرقيقه التى تداعب عقول المدونين
تحياتى يا هانم

ماما أمولة يقول...

فشكووول باشا استاذي

حمد الله على السلامة نورت الدنيا

الحمد لله يا فشكول انا بخير

والحياة لاتخلو

حلو قوي كلامك

كونى دائما النسمه الرقيقه التى تداعب عقول المدونين

يارب أكون عند حسن ظنكم

اشكرك يا فشكووول

طمنا على محمود عمل ايه في امتحاناته

دمت بكل الخير يارب

شريكة في المطعم يقول...

السلام عليكم

روعة بجد يا ماما امولة
كلمات بسيطة ومعبرة

طبطب بكلمة طيبة ولو قليلة

اللؤلؤة يقول...

ماما أموله
السلام عليكم
ماشاء الله
كلمات جميلة جداً ورقيقة جداً
تقبل مرورى

ماما أمولة يقول...

شريكة في المطعم

وعليكم السلام ورحمة الله وبركاته

شكرا يا حبيبتي

كلنا محتاجين اللي يطبطب علينا

دمت بحفظ الله

ماما أمولة يقول...

اللؤلؤة

وعليكم السلام ورحمة الله وبركاته

شكرا لذوقك ربنا يخليك

دمت بحفظ الله

على عبدالله يقول...

السلام عليكم

الله جميل والله
جزاك الله خيرا

مالك فى ايه ؟
مليان ومعبى لحد ما هانفجر !
:)

بارك الله فيك

norahaty يقول...

السلام عليكم ورحمة
الله تعالى وبركاته
هناك مناسبة عزيزة
لصديقة مشتركة بيننا
ارجو المشاركة فيها
وشكــــــــــــراً

العصفورة يقول...

ماما أمولة
السلام عليكم
اللهم آمين
أشكر حضرتك على زيارتك لمدونتى ويشرفنى دوام التواصل
ما شاء الله
كلمات حضرتك أكثر من رائعة وأكثر من ممتازة
فبالفعل هى كلمات رقيقة كلمات جميلة
خالص تقديرى

ماما أمولة يقول...

على عبدالله

وعليكم السلام

سلامتك من الانفجار فضفض ولا يهمك

ربنا يصلح حالك اللهم امين

ماما أمولة يقول...

العصفورة

ازيك يا عصفورتي يا جميلة

اهلا بك في الزمن الجميل

ربنا يبارك فيك اللهم امين

شكرا لكلماتك الرقيقة

دمت بحفظ الله

كلمات من نور يقول...

الله يا ماما أمولة كلمات جميلة بجد عايزه انقلها وابعتها لزوجي في ماسيج لما تجيله لحظات الصمت أو التجاهل العمد

اخبار البنوته الحلوة إيه؟؟

إبراهيم ابني راخ شال المسمار من شهرين والحمدلله ودلوقتي بدأ يعمل ريجيم وبيتابع رياضة مع الدكتور

ربنا يعافيهم من كل سوء

ماما أمولة يقول...

كلمات من نور

اهلا بك يا ام ابراهيم

نورت المدونة

سلامة ابراهيم الف سلامة يارب

اماني بخير الحمد لله كتر خيرك على السؤال

اما كلماتي فهي تحت امرك ارسليها زي ما انت عايزة بس يارب تجيب مفعول

تقديري لك حبيبتي

mahasen saber يقول...

ازيك يا ماما اموله

اخبار حضرتك ايه

واخبار امانى يا رب فى افضل حال دايما

ghorBty يقول...

السلامـ عليكمـ

يا سلام علي الكلمات التي تقطر حب وحنان

جميلة ما ما اموله بارك الله فيك

وسلاامي لاماني كتير وان شاء الله تكون بخير ..

ماما أمولة يقول...

ازيك يا ام عبد الرحمن

الحمد لله حبيبتي انا بخير

ويارب تكوني في احسن حال يارب

سلميلي على بيرو وماما

ربنا يصلح حالك يارب

ماما أمولة يقول...

ازيك يا غربتي وحشاني كتير

يارب تكوني في احسن حال اللهم امين

اماني بخير الحمد لله

شكرا لسؤالك

دمت بكل الود

احمد بدر الدين يقول...

السلام عليكم
وبدأت حملة ( مين هيفطر أكتر )
هل ستشاركنا وتأخذ الأجر معنا
هيا اذن لنشمر السواعد ولنعلى الهمم
ولنخلص لله النوايا
الم تسمع قول النبى صلى الله علية وسلم ... عن زيد بن خالد الجهني قال : قال صلى الله عليه وسلم : " مَن فطَّر صائماً كان له مثل أجره غير أنه لا ينقص من أجر الصائم شيء "
أدخل على هذا الرابط وشاركنا
http://3amood.blogspot.com/

وفاء بركات يقول...

السلام عليكم
الله عليك يماما أموله.. قد أيه لحظات كتير بنبقي في حاجه لإيد تطبطب علينا إيد بعينها قد إيه بنحب نسمع كلمه
نحس بيها بإننا محط إهتمام اللي حولينا.
قد ايه حضرتك مرهفة الحس ورقيقة المشاعر ..

وفاء بركات يقول...

ممكن أعرف سبب قفل مدونة الأستاذه مجداويه لعل المانع خير

ماما أمولة يقول...

احمد بدر الدين

جزاك الله كل الخير ابني الغالي

ان شاء الله ربنا يقدرني على المشاركة معكم

ربنا يتقبل اللهم امين

ماما أمولة يقول...

اختي الغالية وفاء بركات

كل سنة وانت طيبة حبيبتي والعم كله في طاعة الله ان شاء الله

شكراعلى كلماتك الرقيقة جزاك الله كل الخير

اما عن اختنا مجداوية لا اعلم شيئا

انا كنت امبارح في مدونتها وكانت مفتوحة

ان شاء الله خير

دمت بكل الخير