السبت، أبريل 02، 2011

صدى الصوت








شربت كاس الضنى
قالوا اشربي
وخليه كمان قـُوت
داريت  في قلبي الجرح
وليه تداري 
اتكلمي
دا جرحك  ماله  سـُكوت
ناديت  بعزم مافي
جاوبني  الصدى
الريح  معاكِس
مايوصـل ابدا صُـوت
أخرتها  إيه  ماتقولوا
أسكت ولا أتكلم
ولا أكتم جواية المـُر 
وامـُوت
هو اللي يعيش في الدنيا 
لازم يكون حاوي
ويطلع من جيبه كمان
كتكوت
اصبري دي الدنيا لحظة  وتمـُر
وبسرعة كمان  بتفـُوت
معقول
وليه نعيش اللحظة مـُر
ليه نضيع فيهاكل العـُمر
ليه نسكت وليه نداري
ولو صرخنا  
يتـْرَد لـِينا الصوت


هناك 18 تعليقًا:

كلمات من نور يقول...

وعجبييييييييييييييييييييييي

ما هو علشان بنصرخ لمن لا يسمع لنا

شمس النهار يقول...

الله عليكي ياامولة

هو ماينفعش نشيل المر من الحياة؟؟

الاجابة لا

علشان لما نعرف طعم المر لما ندوق الشهد نعرفه ونحافظ عليه

حمدى جعوان يقول...

السلام عليكم
اولا بسجل اعجابى بما خطه قلمك
وكما يقولون

بعد كل دمعة بسمة
وبعد الفراق لقاء
هكذا هي الدنيا
علينا ان نحياها
حزن وفرح
نجاح وفشل
دمعة وبسمه

وان شاء الله الجاى احسن

هكذا هى الدنيا

ماما أمولة يقول...

كلمات من نور
الظاهر ان صوتنا مش عالي
يالا يا نورانية نعلي الصوت :)

ماما أمولة يقول...

شمس النهار
شموسة الغالية
الحمد لله ان شاء الله هاندوق الشهد
أحلى صباح يا شموسة

ماما أمولة يقول...

حمدى جعوان
وعليكم السلام
شكرا لك يا حمدي
ان شاء الله اللي جاي أحسن
نورت الزمن الجميل اهلا بك

جايدا العزيزي يقول...

الله يا اموله

دايما بحس ان روحك قريبه من صلاح جاهين

كلماتك لها معانى ساميه

يسلم احساسك حبيبتى

تحياتى

amiralcafe يقول...

برك الرب لك/ لو صرخنا يتـْرَد لـِينا الصوت/لكن سنصرخ كلما احسسنا بالظلم...
رؤوف

ماما أمولة يقول...

جايدا العزيزي

أختي الغالية ربنا يخليك يارب وتسلميلي
دي شهادة جميلة منك ربنا يكرمك يارب

ماما أمولة يقول...

amiralcafe

وبارك فيك يارب يا رؤوف
لازم نصرخ حتى لو اترد الصوت مش هانسكت ابدا
شكرا لك لتواصلك الطيب
دمت بكل الخير

محمد محمود عمارة يقول...

طيب نعمل إيه يعني مقولتيش ؟
نصرخ و لا نصوت و لا نلطم و لا نلم المدونين و نخرج على ميدان التحرير و لا الواحد ياخدها من آخرها و يشرب توفساكين ( توكسافين )
و بعدين ملقتلناش برضه اللي ميعرفش حركة الكتكوت دي يعمل إيه؟
( كل كلامي هزار )

ماما أمولة يقول...

محمد محمود عمارة
ههههههههههه
لا إحنا نشرب توفساكين :)
ربنا يصلح حالك شكرا على البسمة الحلوة

محمد الجرايحى يقول...

اصبرى دى الدنيا لحظة ...وتمر
لقد نسينا هذه الحقيقة وانغمسنا فى الدنيا كما لوكانت هى المصير السرمدى ...

أحييك ...
بارك الله فيك وأعزك

ماما أمولة يقول...

أخي الفاضل / محمد الجرايحى

هذه هي الحياة لمن غفل عن حقيقتها
تقديري لك أخي
بارك الله فيك وأعزك

الازهرى يقول...

http://www.elaosboa.com/artsys00/ArticleDetails.aspx?Aid=936


http://www.almesryoon.com/news.aspx?id=54998

الف مبروك

أحمد الصعيدي يقول...

الاحساس الجميل هنا

ماما أمولة


أسعدك الله

ماما أمولة يقول...

مبرووك لينا كلنا يا أزهري
ربنا يتمها بالخير يارب
ويصلح حالك وحال كل العرب اللهم امين

ماما أمولة يقول...

أحمد الصعيدي
الاحساس الجميل بتواصلكم الطيب
شكرا يا أحمد