الخميس، فبراير 17، 2011

شعب ناكر للجميل





بيقولوا علينا يا بو جمال إن إحنا ناكرين الجميل
وعايزينا نسامحك ونبوس الإيدين
طب والله كلام جميل
طب إحنا مستعدين نسامحك بس نتكلم معاك كلمتين
أنت يا بو جمال استوردت القنابل المسيلة المتنيلة دي لمين
لعدونا ولا لأولادنا واخواتنا الصغيرين
ولا خراطيم المية اللي بدل مايطفوا بيها حزبك المحروق
كانوا بيفرقوا بيها المصلين
ماتقول رد وأحنا أهو سامعين
ولا متعرفش
طب بلاش القنابل أصل صلاحيتها انتهت 
وأنت برضه نيتك خيروبرضه 
متعرفش
خلينا في الرصاص المطاطي 
اللي حرموه دوليا قتلتوا بيه أولادنا ليه
حرقتوا قلوب أمهاتهم ليه
ولا كمان معرفتش
يا بو جمال
مشفتش عربيات الشرطة اللي مفروض تحمينا
وهي بتدهس أولادنا
بتفصل رجليهم و روسهم
ولا الضباط اللي بينشنوا في عينيهم وصدورهم 
ولا مشفتش
العصيان والطوب والنار اللي بتحرق فينا 
هو إحنا ناقصين حرق مش كفاية الغرق
ولا أنت بتقول يا بخت من بات مغلوب
عايز تدخلنا الجنة صح نيتك سليمة
إحنا اللي ولاد لئيمة
طب هانسامحك بس قولنا
مشفتش عيون سالي وجمال ضحكتها 
مشفتش إسلام وسامح ومحمد 
مسمعتش عن أميرة وحكايتها
طب قلبك منقبضش
مش هم أولادك برضه يابو جمال 
طب قولنا
دول دمهم في رقبة مين
آه عارفة أكيد في رقبة المندسين 
هم السبب منهم لله المندسين عاملين زي غراب البين 
دول مش بني آدمين
سيبك من شهداءنا ومين اللي موتهم أكيد برضه 
متعرفش 
أنت فاضي لإيه ولا إيه 
طب هانسامحك
بس قولنا ليه جوعت شعبك 
واستخسرت فيهم حتة اللحمة واللقمة والرغيف
آه صحيح خايف على صحتهم لتجيلهم تخمة
الأحسن فعلا يناموا خفيف خفيف
ماشي هانسامحك 
بس قولنا يا بو جمال
ليه بتسيب القوي ياكل الضعيف
ليه سبت الظالم والمستبد وعذبت الشريف
ليه فاض الفساد وغطى على البلاد
ليه صغرتنا في عيون العباد
واللي يتكلم ويقول الحق تقولوا عليه ارهابي  
يا ماما دا شيء مخيف
ما تقول يابو جمال 
ولا برضه متعرفش
تصدق الظاهر فعلا إحنا معندناش أصل وخسارة أنت فينا 
طب سيبك من دا كله وإحنا نسامحك بس قولنا
نتأسفلك إزاي !!!!!!!!!!!
ودم أولادنا وأخواتنا مالي إيديك
من التحرير والسويس لبورسعيد واسكندرية 
مادد على الصعيد وسايل 
شايل معاه هموم الوطن 
ماتقولنا !!!!
قادرعلى حمله ولا مين شايله معاك يابو جمال
أحنا معرفناش غيرك أنت 
أنت اللي كنت راعينا 
لا نعرف جمال ولا عمرنا شفنا عز 
ولا عرفنا عدل  
بس بعيد عنك شعبك طلع ندل
ماأنت اللي مربينا
طب آخر سؤال 
وبعدها هاننكتم ونبوس الأيادي ونتأسف
فين خير مصر يابو جمال  ؟؟؟؟؟؟؟؟؟؟؟؟؟؟
ولا بلاش أصل السؤال دا يكسف
برضه لسه عايزنا نتأسف 
 مش هانتأسف
غير لما تجاوب 
بس بجد بجد شعبك دا شيء مؤسف





هناك 24 تعليقًا:

عاشــــــ النقاب ـقــــة"نونو" يقول...

حسبنا الله ونعم الوكيل في الظلم والظالمين اللهم اهلك الظالمين بظلمهم يارب كل عام وحضرتك بخير

الازهرى يقول...

يمكن يبقى كلامى غريب
بس انا حزين على مبارك حقيقي
وبإذن الله هأكتب عن ده بالتفصيل علشان مفيش حد يفهم غلط

الأحداث كانت كتير الفترة الللى فاتت لدرجة إن الواح لما رجع كان خلاص حاسس إنه جرى ألف ميل

بس للأسف بعد تفكير اتضح غن كل ده أول المشوار مش أخره

تحياتى دوما

♥نبع الغرام♥♪≈ يقول...

اةةةةةةةةةةةةةةةةةةةةةةةةةةةةة

اةةةةةةةةةةةةةةةةةةةةةةةةةةةةةةة

وألف اةةةةةةةةةةةةةةةةةةةةةةةةةة


تعليقى وصل على الفيس بوك

مش لاقيه كلام بجد الكلام اتشحر بزورى

حسبى الله ونعمه الوكيل

Tarkieb يقول...

زمان واحنا عيال ضغيرة في ابتدائي كان بيجيبو لينا دادات البودرة ....شوية دادات حجم عائلي لابسين ازرق لبني وطرح بيضا وماسكين في ايدهم كيس بودرة مبيد حشري وادي ياجدي على دماغنا ...عشان يعني محاربة القمل....وكنا كلنا نقعد نضحك ونهرج...الغريب ان العيال اللي فعلا كانت مقملة كانت هي الوحيدة اللي بتكون زعلانة على فراق القمل...وربنا كنت بسأل نفسي إشمعني؟ ده ماصص دمهم ومهرشهم على واحدة ونص...بس تعملى ايه بقى...الراس تحب مصاها .....داهية لا ترجعه مبارك هو ولا قمله.....كانت ايام زبالة

إبن النيل يقول...

السلام عليكم

نحن شعب جميل جدا حافظ للجميل جدا وكمان ممكن ينسي القسوة لكنه لا ينسي الدماء التي سالت ليست في الثورة فقط ولكن قبل ذلك أمثال خالد سعيد وسيد بلال وغيرهم الكثيرين
دمتي بكل خير

ثـــوره الــغضب يقول...

بوست جميل

انا كنت موجود فى الاعتصام وفى جمعه الغضب

المشكله مكنتش فى كنابل مسيله لدموع المشكله الاكبر

انها كانت فاسده وكانت بتعمل تشوهات فى الحلق والانف وبتجيب سرطان

يعنى كان شيئ افظع من الفظيع

كان نفسى اقول لرئيس الجمهوريه ربنا يشفيك وكان نفسى تتوب وتعمل حاجه لشعبك ربنا يغفرلك بيها بس سبحان الله قدر الله جاااااء

وعلى فكره يا رئيس انتا لو ربنا رحمك ومت شعب مصر كلو هيطلع وراك مش عشان انتا رئيس كويس بش عشان احنا شعب حنون وطيب وجدع وشهم ونحب نوصل لشعوب العالم كلو ان المصريين كرمااااء جدا وطييبين جدا بأصلهم وعزت نفسهم

محمد أبووردة يقول...

علي أد ما انا فرحان فرح لا يوصف وليس له مثيل ان الثورة حققت مطالبها واني شاركت فيها من البداية الي النهاية
الا ان البوست دا قلب علي المواجع
فكرني أد ايه احنا لتذلينا
أد ايه شربنا المر واتعذبنا
كل ما افتكر الايام اللي اعتقلت فيها وافتكر ان كلاب امن الدولة كانوا بيعاملونا زي العبيد اقول لنفسي انا مش عارف احنا مستحملين دا كله ليه
ولا لما افتكر مشهد اخويا كريم وانا بنادي عليه ياكريم ما تطلعش الكوبري فيه قناصة هنكون صيدة سهلة لهم
وكريم يرد عليا يقول " انها الجنة يا اخ محمد والله اني لاشم ريحهاسامع بتناديني " ويجري ويقاتل حتي يلقي الله شهيدا
ياااااااااااااااه

لكن فعلا جه الوقت اللي قام فيه الشعب كله وكان ايد واحدة
وحقق اللي كنت بحلم بيه في يوم من الايام
وحقق اللي كريم كان بيحلم بيه
وبقول له نام وارتاح فيقبرك يا كريم
دمك ما رحش هدر
فزت ورب الكعبة

******
ياااااااااه
انا بجد مش مصدق

من كل بستان زهرة يقول...

لو كان هو ده نكران الجميل فأهلا به

عايزه اعرف اتأسف له على ايه!!!!!
على سرقة بلدنا ونهبها
على انه خلى شويه حراميه وفاسدين
يتحكموا فينا 30 سنه
يااااااااااااااااااااه
الواحد يقول ايه ولا ايه
طيب بلاش انا
الأم والأب الي فقدوا ولادهم يسامحوا على ايه
يسامحوا ازاي

لأ وبعد كل ده طالع بكل بجاحه يقول
يحزنني ما ألقاه من بني وطني
هو احنا عملنالك حاجه ياظالم

ده لو في حد لازم يعتذر يبقى هو
يعتذر لينا على العذاب الي عذبه لينا

وحتى لو قعد عمره كله يتأسف مش هيكفي

الحمد لله انه اتخلع
ربنا ينتقم منه
حسبي الله ونعمه الوكيل
ربنا عدل وانتقامه اعظم

أسطى في زمن البلي يقول...

الله .. الله .. الله


تسلم ايد حضرتك يا ماما أمولة


دش بااااارد قوي .. بسس للي يفهم


و البعيد كان غبي


و لا عزاء في أمثاله رئيسا



و من يقرأ التاريخ .. سيتبين له أنه يعيش وهما في عنتريات أخرى




رحم الله القائد العبقري سغد الدين الشاذلي

Unknown يقول...

سكت الكلام ....
لم يعد هناك فائدة من السؤال أو حتى الجواب.
الشعب قال كلمته ....
ولما الشعب يقول كلمته لابد أن يستجاب.

أمل حمدي يقول...

عاشــــــ النقاب ـقــــة"نونو"
اللهم أمين
وأنت بخير وصحة وحرية يارب

أمل حمدي يقول...

الازهرى
تقديري لك ولرأيك يا أزهري
لا أحجر على أراء الآخرين
لنا من الآن أن نمارس الديمقراطية بحق
ربنا يصلح حالك يارب ابني الغالي

أمل حمدي يقول...

نبع الغرام

وصل يا نوسة
وحسبنا الله ونعم الوكيل

أمل حمدي يقول...

Tarkieb
جئت ببسمتك الجميلة
حمد الله على سلامتك يارب
خليتني أهرش ههههههههه
متخافش ميقدرش يرجع البودرة بتاعت شبابنا واقية مانعة
محدش هايمص دمنا تاني
تقديري لم يا تركيب

أمل حمدي يقول...

ابن النيل
وعليكم السلام
نعم لاننسى الدماء
حسبنا الله ونعم الوكيل
دمت بحفظ الرحمن

أمل حمدي يقول...

ادمـ الـــمصرى

يا الله ربنا يحفظكم ويقيقم شرها اللهم امين

قول اللي نفسك فيه ياريت يحس ويسمع
ربنا يصلح حالك يا آدم يارب

أمل حمدي يقول...

نور الدرب
أرهقني ردك
جعل الله كا ماقاسيته في عهدهم في ميزان حسناتك
سينتقم الله منهم دنيا وآخرة
وسينعم ان شاء الله أخيك كريم بجنة الرحمن
اللهم اكتبه من الشهداء واحشره برفقة رسول الله صلى الله عليه وسلم والصديقين وشهداء
أحسبه ممن صدقوا ماعاهدوا الله عليه ان شاء الله

صدق يا نور مصر حرة
وتحيا مصر وشعب مصر

أمل حمدي يقول...

من كل بستان زهرة
بجد شيء مؤسف
شعبنا فعلا مسامح لكن مش قادرين ابدا
شكرا لك حبيبتي ولتدفق مشاعرك الصادقة
ربنا يصبر أهالي الشهداء اللهم أمين

أمل حمدي يقول...

أسطى في زمن البلي
الحمد لله يا محمود
ظهر الحق وزهق الباطل إن الباطل كان زهوقا
ورحم الله القائد العبقري سغد الدين الشاذلي وكل شريف صادق من أمثاله

أمل حمدي يقول...

أ / محمد الجرايحى
نعم الشعب قال كلمته وهي كلمة الحرية
الحمد لله على كل شيء
تقديري لحضرتك

عالم حبيب يقول...

{قُلِ اللَّهُمَّ مَالِكَ الْمُلْكِ تُؤْتِي الْمُلْكَ مَن تَشَاء وَتَنزِعُ الْمُلْكَ مِمَّن تَشَاء وَتُعِزُّ مَن تَشَاء وَتُذِلُّ مَن تَشَاء بِيَدِكَ الْخَيْرُ إِنَّكَ عَلَىَ كُلِّ شَيْءٍ قَدِيرٌ }آل عمران26

أمل حمدي يقول...

عالم حبيب
سبحانه وتعالى
إنه على كل شيء قدير

تقديري

Emtiaz Zourob يقول...

مش عارفة مين اللي قال انا اسف ياريس . . اسف على شو بالضبط ؟؟ على اللحوم المسرطنة اللي كان بيستوردوها علشان يطعموها للشعب المصري ، ولا على النفايات النووية والذرية الاسرائيلية اللي اندفنت في صحراء مصر ، ولا على اغلاق معبر رفح في وجه الفلسطينيين والسماح للاسرائيليين بالتجول براحتهم في سينا وفي ابو حصيرة ، متأسفين على شو على الشهداء اللي ماتوا ولا على المرضى اللي ماتوا من قلة العلاج ، متأسفين على البطالة والفقر ، على سوء وضع التعليم في مصر ، متأسفين على البلطجة والاجرام ، متأسفين على العشوائيات والاحياء الفقيرة ، مش عارفة متأسفين على شو ولا على شو ؟؟
انا باعرف انه احنا متأسفين على اننا سكتنا ثلاثين سنة ومتحركناش ،،
يحفظك الله يا مصر ويديم عليك الحرية والكرامة ..

أمل حمدي يقول...

وجع البنفسج
ربنا يحميك ويحمي مصر وكل بلادنا العربية
نورتي الزمن الجميل