الأربعاء، يناير 16، 2013

وطني مش البلد دية ...








أنا وطني 

مش البلد دِيــَّة 

و لا البلد دِيــَّة

و لا كمان البلد  دِيــَّة

أنا وطني بحر و نهر 

و شجرة و طريق 

و مرسى و معدِّية 

أنا وطني 

دِكـَّة  و ظـِلاية 

و ابتسامة طفل 

و نظرة شوق 

للحبيب مستخبية 

أنا وطني طـِير

جوَّاية معشش 

ساكـِنـِّي 

وأنا ساكـْنـَاه 

بيرفرف

ويطير وأنا وياه 

في السما بـِحـُرِّية

أنا وطني 

طفولتي و شبابي

وحبِّي الأولاني

وأول حرف كتبته

وأول دَقـَّة 

في قلبي مدَّاريـَّة

 أنا وطني جواية  

أيام و سنين و عمر 

مليان حكايات 

مـِنْ دَا علـَى دَا 

على الجبين  مروية 

أنا وطني مش اسم

ولا مكان  ولا زمان 

أنا وطني مرسومة بيه 

وهو منسوج بيا..
.
.
.

هناك 8 تعليقات:

رشيد أمديون. أبو حسام الدين يقول...

تتحفينا يا أمل
حيث وضعت الحرف تبدعين، فصحى أو عامية تبدعين..
لله درك يا سيدة الحرف

مودتي

أمل حمدي يقول...

رشيد
بل أنت الذي تأثرني بحضورك الطيب وكلماتك التي تسعدني
دمت طيبا

فشكووول يقول...

انا وطنى
حزين
غضبان
بيجرحنى .. يكسر عظامى ..
وطنن عطشان بيحب دمى ويحب لحمى
وانا غلبان .. مسكين ماليش فيه امان
بيطردنى وفى البحر بيغرقنى
فى القطار ....... بيقتلنى
تحت انقاض العماير ..... بيدفنى
على الطريق ...... بيصرعنى
وفى التحرير .. ماليش ديه
وفى الشوارع .. هموم مخفيه
يبقى دا وطن
يبقى دى ام
زهقنى .. طهقنى .. ماعادش ينفع كل يوم
اروح له اطبطب عليه
لازم احاسبه
لازم اراجعه
اقول له انا ابنك
انا نبتك
حنانيك على
ولا ... اشوف لى
وطن تانى
وياريت حد يرضى بى
مصيبتى .. انك وطنى

أمل حمدي يقول...

وبشر الصابرين يا فشكول

معنديش كلام أقوله غير إنا لله وإنا لله راجعون
دمت بكل الخير يارب

منجي بـــــــــــــاكير يقول...

مـــــــــا أجمل وطنك يا أمّولة !!

ْ~ْ~ْ~ْ~ْ~

كلمات و جمل تحمل أجمل الأغنيات و أرقّ الإحساسات و رائع الجماليّات .

تقديري و إعجابي

صاحب الزمن الجميل

أمل حمدي يقول...

منجي بـــــــــــــاكير
صــــاحب الزمن الجميل
جميل الحضور
عطر الكلمات
مودتي وتقديري

zizi يقول...

هو ده وطننا كلنا بس هو فين يا أمل للأسف مش لاقيينه ..

Aml Hamdy يقول...

موجود يا زيزي موجود جوانا بيجري في دمنا