السبت، أغسطس 30، 2008

رسالة الى .......






سامحوني في كلامي هااتكلم من غير تكليف
كلكم اولادي واخواتي ولا ايه؟
يمكن دي تكون اخر رسالة مني لكم استحملوني شوية
انا دخلت عالم المنتديات من حوالي سنة وشهور قليلة لان ماليش اختلاط بحد
عرفت ناس قليلة لاني طبعي كدا مش اجتماعية وحتى اللي عرفتهم كنت باختارهم بحذر
ومرت الايام وصفصفوا على تلاتة اربعة
بجد كنت حاسة اني امهم ازعل لزعلهم وافرح لفرحهم كنت بقعد ساعات
وساعات احكي معاهم واحاول احل مشاكلهم واكون جنبهم في وقت الشدة
والاهم من كدا انهم هما اللي عايزين كدا
لكن عايزني اايدهم بس اقول انتم صح وبس
ولو يوم واجهت ولا زعلت ولا حتى اتنرفزت على حد فيهم
هههههههههه
ابقى غريبة
الايميلات تتقفل في وشي
حتى الاوف لاين ميتردش عليه
بيعاقبوني وميكلمونيش مع اني امهم او زي امهم
بحس بألم جوا قلبي واقول اسيبهم وابعد عن كل حاجة
انا عايزة اعرف هو دا ايه وليه ؟
لو يعرفوا انا بحبهم قد ايه ؟
لو يعرفوا اني ساعات كنت بقصر في حق بيتي واولادي
علشان اقف جنبهم في مشكلة من مشاكلهم
وكان عملي كله بحب وسعادة
هو دا النت والتعامل فيه
والا انا غلط
قولولي في ايه؟
على العموم كتر خيرهم
انا مش ها اقول الا شكرا

هناك 70 تعليقًا:

saso يقول...

مبسوطه انى اول تعليق لاول مره بس زعلالالالالالالانه اوى للكلام اللى باسمعه منك يا ماما...

ليه قلتى كدا ؟

يا ماما حتى اذا كان حصل بعض الغلط من اى طرف ف انتى بعيده عن المواضيع دى كلها ...انتى مقامك فوق كده عندنل كلنا وانتى عارفه كده ...عايزه اقولك يا ماما رغم ان ده مينفعش يتقال على ساحات النت الا انىوالله يا ماما يوم مهتزعلى منى هيبقي يوم وحش جداااااااا ف حياتى لانى بحبك بجد ومقدرش اتخيل حياتى من غير ماما اموله اللى بفضفض معاها بحاجات محدش ابداااا يعرفها ..

ماما اوعى تتخلي عنى ا...انا بقولها ومش مكسوفه انا محتاجه ليكي اوعى يا ماما تكون دى اخر رساله زى مقلتى

واللى زعلانين دلوقتى مسيرهم يرجعوا براحتهم ....الله اعلم بيهم

اتعودت انى اكون حسنه النيه اولا الى ان يظهر العكس ...

ماما
انا ...................والله العظيم

بحبـــــــــــــــــــــــــــك

بنتك ساره

مـجـنـووون يقول...

والله العظيم أنتي ست عظيمه
وبجد بشرفني أنك تكوني أمي رغم أني كبير شويه ههههههه ،
وبعدين يا ست الكل متزعليش من حد ، مش انتي بتقولي زي أولادك يعني استحمليهم شويه ، يمكن في ظروف بتحصل زي ما في أقات بتحصل معايا ( يكون النت ضغيف والماسنجر بيقفل أو مكنش علي الجهاز ، أو أكون مش مركز ، أو أكون مليش نفس للكلام ) يعني في حاجات كتيرة ، وأحد الصالحين قال التمس إلي أخيك 70 عذراً فأن لم تجد فقول لعلي في أعذار لا أعرفها ،
وبعدين إلي يسيب أم زيك يبقي من الأخر ميستهلش زعلك
وشوفتي سوسو بتقولك ايه ، والله لو سوسو دي بنتي رغم أني صغير شويه ههههههه كنت متخلتش عنها

وأعتبريني أبنك رغم أني كبير شويه هههههه

وعلي فكرة دي حاجه كويسه أنك تهتمي بمشاكل ناس تعرفيهم

بلاش التكشيرة دي ، شكلك حلو من غيرها
ويا رب يديم عليكي الفرح والسعاده

وبعدين في واحده عندها ابن مجنووون وتزعل هههههههههه
تقبلي مروري
ابنك مجنووون

bastokka طهقانة يقول...

اللهم بلغنا رمضان و اعنا على صيامه و قيامه و اجعلنا من عتقائك من النار في هذا الشهر الفضيل
امين
أختكم
عبير عبد الشافي صاحبة مدونة طهقانة و كلبوزة لكن سمباتيك

ماما أمولة يقول...

ازيك ياساو يا حبيبتي انا عمري ما ازعل منك ابدا ربنا يصلح حالك وحال كل شباب المسلمين
شكرا يا سارة على اهتمامك وردك وعدم تكبرك على الاعتذار لانسانة على الاقل اكبر منك سنا
وتأكدي اني عمري ما هااتخلى عنك او عن حد من اولادي لاني انا كدا بزعل قوي على قد حبي وبسامح قوي برضو على قد حبي
شكرا يا سارة
وعلى فكرة انا كمان بحبك قوي

ماما أمولة يقول...

ازيك يا مجنووون والله انت ابن حلال خلتني فعلا ضحكت ونسيت الزعل
بس يا مجنون الجيل دا صعب قوي مش بيعرف يفرق مين حبيبه ومين عدوه
مين صغير ومين كبير
على العموم علشان خاطرك يا ابني مش ها ازعل لان اللي زعلني ميعرفش انا بحبه قد ايه ولو يعرف يمكن عمره مايزعلني
شكرا يا مجنووون
على فكرة انا بكسف وانا بقولك كدا
بس انت شكلك مبسوط من الاسم دا
ياريت تسعدني دايما بوجودك

ماما أمولة يقول...

ازيك يا عبير نورتيني والله

كل عام وانت بخير يا عبورة وان شاء الله

ازورك في مدونتك

دمتي بخير

Sourah يقول...

يا ماما امولة كل سنة و انت طيبة ، انا قريت البوست بتاعك بس و الله ماتزعليش ، اولا انت بتتكلمي معاهم و بتقفي جمبهم من جانب حبك ليهم و ابتغاء مرضاة الله و زي ما بيقولوا كده بتتقى الله فيهم ..

اعتقد انه مهما حصل كان لازم يناقشوكي و يعرفوا منك وجهة نظرك ، مش يقفلوا الشات و الميلات ..

عموما انت اسمك "ماما" يعني حب مابينتهيش و عطاء مالهوش حدود ، و "امولة " تدليل امل وده معناه ان مفيش يأس و لا اي روح سوداوية ، و على فكرة انت بأه ماتقدريش تزعلي و لا تشيلي في قلبك، لأن حب الام لاولادها عامل زي حاجه كده ماشية في دمك عشان كده بقوللك كلنا ولادك و محتاجينلك ، و حقك على روسنا كلها ..
و بالرغم من اني لسه ما انتميتش لجروب اولادك ، بس بقوللك يشرفني انك تكوني اما لي بجانب مامهيتيني .

و على رأي حليم :

بيع قلبك بيع حبك شوف الشاري مين .....



و اخر الكلام سلاااام ...!!!!

ماما أمولة يقول...

صورة يشرفني حبيبتي انك تكوني بنتي

الصراحة بعد الكلام اللي انا شفته

وحسيته منكم كل حاجة زعلتني نسيتها

خلاص ربنا مايحرمني منكم ابدا

ودايما يارب احباب في الله

وكل عام وانت بخير حبيبتي صورة

جمعاوي يقول...

السلم عليكم امنا و

مش عارف مين مزعلك بس لو أ‘رفه ولا بلاش رمضان على الابواب

المهم احنا ما نستغناش عنك يا امنا

وربنا يخليكى لينا وسرنى جدا زيارتك لمدونتى المتواضعة لا وكمان اعجابك باسلوب الكتابة

ياريت بس تنورينا تانى اليومين دول علشلن فى كلام كده مكتوب لحضرتك .......زأيوة هتلاقيه تحت خالص وبلون مميز

دمتى لنا بخير ويلا سلام

ماما أمولة يقول...

ربنا يخليك يا جمعاوي

سبحان الله الواحد ممكن يزعل من واحد

ربنا يعوضه بعشرة

الحمد لله

شرفتني

وكل عام وانت بخير يارب

شملولي بن سحلولي يقول...

رمضان كريم
وأن شاء الله ما تكونش ا خر رسالة
ده انت لسه قدامك رسالة تكمليها
بعدين مش كل اخطاء اللي حوالينا بنكون سبب فيها يمكن الظروف يمكن تركيبة الشخصية يمكن ويمكن يجوا بتاع 35 يمكن كده
بس اللي مش ممكن انسان في حنيتك تكون سبب في حاجة

ماما أمولة يقول...

شملولي بن سحلولي نورتني

و35 بتاع دول ضحكوني

الحمد لله انا مش سبب في حاجة

والحمد لله اني لقيت حوالية كتير قوي

طيبين

والله انت اللي حنين

كل سنة وانت بكل خير

ومش هاتكون اخر رسالة

جمعاوي يقول...

السلام عليكم ماما أمولة وأا أحمد الله على مشاعر حضرتك الطيبة دى وربنا يا رب يكرم حضرتك وزيارة حضرتك لمدونتى حاجة تشرفنى ودمتى لنا بخير وما نقدرش ننسى حضرتك فى رمضان ومستنيين حضرتك بعد رمضان وياريت تنورينا من وقت لوقت كده ما تخليهاش مقاطعة كاملة يعنى فى رمضان ويلا سلام

ماما أمولة يقول...

ان شاء الله يا حمعاوي ها ابقى اطل

عليكم واطمن

كل عام وانت بخير يارب

Saudi Romantic يقول...

ألســــــلام عليـــــكم

ألسيده ماما أمولة انا لا اعرف حضرتك من قبل وانت ايضاً ربما لاتعرفيني من قبل .. ولكن هذا لايمنعني من ان اقول لك
بمناسبة شـــهر رمضــــان المـبـــــارك كل عـــــام وأنـتــــم بـــخــــــير

http://up3.m5zn.com/get-8-2008-zco52aofwrk.jpg

http://up3.m5zn.com/get-8-2008-q5gh5kr9n6s.jpg

في أمـــــان ألله

ashraketamal يقول...

ماما امولة
السلام عليكم
فكرة حلو للعتاب الاحبه والابناء
بجد انا مش بعرف مدونتك الا من ايام قليلة لكن بجد بحبها ربنا يوفقك
واتمنى مش تكون اخر رسالة لينا لاننا فعلا بنعزك
بعدين انا جاي اقولك كل عام وانتي الى الله اقرب
رمضان كريم ليك عندي هديه اتفضلي حمليها من مدونتي
القيكي بتقولى كدا
ربنا يصلح الاحوال يارب ويهدي كل الناس واولهم انا
تحياتي
اشراقة

Dr.m يقول...

السلام عليكم
أولا كل عام وأنت بخير

ثانيا ...ليه كده بس ...آخر رساله ليه ..يبقى في رسايل جايه كتير ...

وبعدين ...لا تحزني إن قابل نصيحتك أحد بحزن أو ضيق ...واحتسبي ذلك دعوة في سبيل الله ...أحسبك كذلك

وكم منا من لا يحب مشرط الطبيب ... وهو لمداولته ومعالجته ....

تحياتي لك ...وأنتظر المزيد من الرسايل
سلام

غير معرف يقول...

بسم الله الرحمن الرحيم

كل عام وانت بخير بس سمحني علي تعليقي حضرتك غلطانه كتييييير لنو حضرتك سمحتي بنك تتعملي مع هيك ناس انت اكبر من انك تكوني ليهم اما الله يهدهم وخليكي لنه وفي نهيه بقولك سمحني مر ثاني عبير من غزه

ماما أمولة يقول...

اشراقة

شكرا لشعورك الطيب

ربنا يبارك فيك يارب

انا شاء الله مش ها افوت الهدية وها

اروح احملها

جزاكي الله كل الخير

ماما أمولة يقول...

Saudi Romantic

شكرا لتعليقك ومرورك ويسعدني معرفتك

والتواصل بين المدونات وتبادل الاراء

كل عام وانت بخير ان شاء الله

ماما أمولة يقول...

Dr.m

حمد الله على السلامة

ويارب تكون وفقت في امتحاناتك

وشكرا لكلامك الجميل

وكل عام وانت بخير

ماما أمولة يقول...

ابنتي عبير من غزه

اهلا بك في مدونتي نورتيني وشرفتيني

وشكرا على شعورك الطيب

ربنا يصلح حالك ويفرج كرب كل اهل

غزة اللهم امين

اتمنى تكرار الزيارة

دمتي بحفظ الله ورعايته

وكل عام وانت بخير

طارق الغنام يقول...

الاخت الكريمه اموله
احزننى بوستك
فعلا الصراحه الان تقفل الابواب
فعلا النفاق الان يسود
فعلا من نوجههم للصح يغلقوا فى وجهنا الباب
ولكن صدقينى
الاجر عند الله وحدة
كل عام وانتى بخير
كل عام وانتى الى الله اقرب
تقبلى تحياتى
ودمتى بحفظ الله

Mohamed Dawod يقول...

سلام عليكم
بصراحه اللى يعمل كده مع حد وقف جنبه وسمع منه وحاول يساعده ميتزعلش عليه ويتنسى فى ثوانى. لان الصداقه مش معناها بس انى اقولك انت حلو على طول. لا لازم كمان وقت ما تكون غلطان تعرفها من صديقك احسن ولو مقبلتهاش منه يبقى انت مش بتعتبره صديق. الخلاصه يا ماما أموله....على طول دراعك وارمى كل اللى يتصرف بالشكل ده معاكى.....اسف لو كنت جرحت حد....خالص تحياتى وشكرا

انا ودماغي يقول...

اللى أنتى عملتيه ده يا ماما يدل على أنك إنساسة راقية و بنت بلد جادعة ..بس للآسف فى ناس متحبش تسمع حاجة غير الرأى اللى هى عايزاه و للآسف دول بيخلو الواحد طالع من المناقشة معاهم دماغه حتفرق و الأسخن أنك بتشوفى حد أنتى بتحبيه و ممكن يغرق و أنتى قادرة تساعدى و هو بيقولك لا..عارفة لو حد أنتى مش بتحبيه كنتى قلتى أدى عملت اللى عليا و خلاص لكن مع حد أنتى بتحبيه أنتى بتكونى فعلا عايزة تعملى كل حاجة و أى حاجة عشانه

لازم الواحد يعرف إنه زى ما بيصيب أحيانا بيخيب و يعرف إن اللى قدامه لما بينصحه بينصحه لوجه الله مش للهجوم الواحد لازم يكون عنده مخ شوية عشان يعرف اللى قادمه عايز مصلحته و لا عايز يهاجمه

على العموم انتى صح يا ماما و ده المفروض يخليكى تبقى معاهم فى كل حاجة بس يوم ما يجوا ياخدو رأيك يبقى ستوب و الله أنا عملت كدة مع ناس كتير عشان المرارة مع أنهم مع أحلى الناس اللى عرفتهم عن طريق المنتدى اللى أنا فيه

انا ودماغي يقول...

و الله يا ماما بجد بجد أنا حبيتك أوى فى الله .......... ربنا يخليكى يا رب

ماما أمولة يقول...

الاستاذ طارق الغنام اهلا بك

انا اسفة لحزنك

وشكرا على شعورك الطيب

جزاك الله خيرا

وكل عام وانت بخير

ماما أمولة يقول...

الاستاذ محمد داوود

انا معاك في كل كلامك

لكن الواحد ساعات قلبه مش بيطاوعه

بيحاول يرمي لكن مش بيقدر

ربنا يهديهم يارب ويصلح حالك وحال

كل اولادي اللهم امين

انا سعيدة بوجودك وشعورك الطيب

واتمنى تكرار الزيارة

وكل عام وانت بكل خير

ماما أمولة يقول...

حبيبتي في الله انا ودماغي

انا كمان حبيتك قوي في الله

ربنا يوفقك في دراستك ويصلح حالك

انا سعيدة بمشاركتك وبرأيك السديد

وماشاء الله عليكي

كل عام وانت طيبة وبخير ونجاح يارب

عاقلة علي ارض الجنون يقول...

بعضنا أمه أمامه .. و بعضنا أمه لم تولد بعد ..

ماما أموله ..

هناك من لا يقدرون الاهتمام و الرعايه ..

تحياتي لرقة مشاعرك

أكون او لا أكون يقول...

السلام عليكم ورحة الله وبركاته...
كل سنه وحضرتك طيبه وبخير وصحه وسلام...
ليه بس كده يامامااموله... يعني اول زياره لي الاقيكي زعلانه...

بس ان شاء الله في زيارتي التانيه الاقي بوست يعبر عن ان كل الزعل راح... يارب...
رمضان كريم...

نهر الحب يقول...

انا قرات البوست
فى حاجات كتيرة بتحتمل سوء التفاهم
بس اسلوب التعبير عن الضيق بيكون بشكل مش لطيف
اقولك متزعليش وان شاء الله تتحل المشاكل دى بسهولة
تحياتى

نهر الحب يقول...

أسأل الله الذي لن تطيب الدنيا إلا بذكره
ولن تطيب الآخرة إلا بعفوه
ولن تطيب الجنة إلا برؤيته
أن يديم ثباتك ويقوي إيمانك وصحتك
ويرفع قدرك ويشرح صدرك
ويسهل خطاك لدروب الجنة
وأن يجعلك من عتقائه من النار
ومبروك عليك شهر رمضان

ماما أمولة يقول...

ابنتي عاقلة على ارض الجنون اشكر لك

كلامك الطيب

سعدت جدا لمرورك وتعليقك واتمنى ان

تتكرر الزيارة

دمتي بحفظ الله

ماما أمولة يقول...

ابنتي اكون او لا اكون

سعيدة جدا علشانك نورتيني

وان شاء الله المرة القادمة تلاقي بوست

يسعدك

كل سنة وانت بخير

وربنا يعيده عليكي بالفرح يارب

ماما أمولة يقول...

نهر الحب شكرا يا حبيبتي

لرقتك ولدعائك ربنا يتقبل منك يارب

ونكون صحبة في جنة الفردوس الاعلى

أمير البلانكو يقول...

ماما اموله

أولا عايز أعرفك بنفسي انا صديق جديد للبلوج بتاعك وأول مره أزور أي بوست ليكي ...

بس مش عارف ليه لما قرأت البوست بتاعك شدتني حاجه غريبه وعلي طول قلت لنفسي انك مش ممكن تسيبي أصدقائك اللي اتعرفتي عليهم علي النت أو علي البلوج وكل دا علشان أنا حسيت ان قلبك كبير وزي ماانتي تشرفتي بوضع كلمه أم علي البلوج بتاعك يبقي لازم تعرفي أن الام دايمآ قلبها كبير وبتسامح حتي لو هيا المجني عليها أو المظلومه لازم تسامح وفي حاجه كمان أسلوبك في الكتابه رائع بجد هانفتقدك

أنا أسف لطول الزياره

ماما أمولة يقول...

اهلا بك يا امير البلانكو

سعدت بتعليقك وعندك حق انا ام ولازم

استحمل اولادي

وعلى فكرة انا سامحتهم لاني بحبهم

شكرا يا امير على شعورك الطيب

واتمنى تكرار الزيارة

وان شاء الله تعلق على البوست الجديد

دمت بخير يا امير البلانكو

أمير البلانكو يقول...

مام اموله

انا سعيد جدآ انك هاتكملي في طرح قصصك الجميله ودواوينك الرائعه أشكرك علي سعه صدرك

رجاء :اريد منكي الذهاب الي مدونتي مره أخري لمعرفه رأيك في القصيدتين اللي قبل اللي انتي زورتيها أتمني انا أري ردك بكل وضوح بدون مجامله

سلام
وكل سنه وانتي طيبه ورمضان كريم

ماما أمولة يقول...

شكرا يا امير ربنا يخليك

انا سعيدة بوجودك بيننا

علي محـمــــــد يقول...

السلام عليكم

من بعد اذنك انا قلدتك في الخير وركبت نفس كود القرأن الكريم في مدونتي أعرف ان هذا تميز لمدونتك وأكاد أجزم انك سعيده بأخذي لنفس الكود وبالذات من مدونتك وهذا لان الاجر الذي أسأل الله العلي القدير أن يمنحني اياه لك مثله بإذنه تعالى والدال على الخير كفاعله :)
جزاك الله خير

في امان الله

ماما أمولة يقول...

ازيك يا علي

طبعا سعيدة دا قرآن وياريت الكل

ياخد الكود ويضعه في مدونته

بجد يا علي انا سعيدة بمعرفتك

ربنا يبارك فيك يارب ويصلح حالك

وحال كل المسلمين

ahmed_k يقول...

أولا إسمحيلي أقولك يا أموله كده حاف
منغير ماما علشان مكبركيش هههههه
وبعدين أول مره أدخل ألاقيكي بتقولي
آخر رساله مني لكم أيه ده!!!!
مش تستني حتى نتعرف وتحليلي حبة
مشكلات وبعد كده اعتزلي

وعلى فكره يا أموله إستقالتك مرفوضه
ومفيش أدامك حل غير إنك تكملي المشوار

خلاص خلص الكلام في الموضوع ده

بصي يا أختي العزيزه
الشات أنا مستغرب إنك صادفتي فيه حد صادق من أساسه
كله بيكدب علي كله
أعملي زيي وإعتزلي شات وخليكي
في عالم المدونات وفقط

تمام إتفقنا
وعايز أشوف إسمك منوني في صفحة التعليقات عندي دايما

ويا أموله يا ريت تخللي صفحة التعليقات عندك صفحه عاديه
مش منبثقه زي دي
علشان بطيئه جدا

وتقبلي خالص تحياتي

في أمان الله

ماما أمولة يقول...

اهلا استاذ احمد

بجد نورت المدونة المتواضعة بتاعتي

ان شاء الله مش هاتكون اخر رسالة

لان الرسالة دي هي اللي خلتني اعرف كل

الناس الحلوة اللي اتلمت حولي بطبع

العربي الاصيل في وقت الشدة

على فكرة انا متبعاك وبقدرك جدا

انا سعيدة جدا بتشريفك

وكمان التعليقات مبقتش منبثقة

واللي في الصفحة الرئيسية دا مش شات

دا زي عداد الزوار مش بيكتب في كلام

وعلى فكرةانامعاك ان نادر لو لقيت

الصدق على الشات

شكرا واتمنى تكرار زيارتك اخي العزيز

bos bos يقول...

سيبك من أى كلام ومن أى حاجة
ومش مهم بعض الناس لاقتيهم مش كويسين يبقى الكل وحش
لسة فيه الكويس

ابقى طمنينا عليكى

تحياتى

نهر الحب يقول...

ان شاء الله يوم السبت الموافق 13/9
هيكون فى تجمع للتبرع فى مستشفى ابو الريش للاطفال
بناء على اقتراح قوس قزح
اتمنى انى اشوفكم هناك
تعالوا نحاول نرسم بسمه ونطهر ذنب
وبعدين هيكون فى افطار جماعى

ماما أمولة يقول...

ابنتي boa bos

سعدت بتشريفك لمدونتي

وان شاء الله نتواصل وادينا في ايد بعض

وكل عام وانت بخير

إيمان عاطف دياب يقول...

تدعوكم اللجنه المصريه لفك الحصار عن غزه واللجنه الشعبيه لفتح معبر رفح لتلبيه نداء الدكتور حمدي حسن والحمله الشعبيه لكسر الحصار عن غزه ..
للخروج في قوافل بإتجاه معبر رفح من أجل رفع الحصار عن غزه .
وقد أعلنت اللجنه المصريه لفك الحصار عن غزه عن التحرك بقافله من أمام نقابة الصحفيين بالقاهره يوم الأربعاء 10 رمضان الموافق يوم 10 سبتمبر بإتجاه معبر رفح .. علي أن يكون موعد الإنطلاق في تمام الساعه 6 صباحا مباشره .
* نرجو ممن يود المشاركه الإتصال باللجنه علي الأرقام التاليه للحجز من أجل توفير أماكن و أوتوبيسات للجميع
* الإشتراك بالقافله ب 30 جنيه للفرد الواحد
* نرجو الإتصال بالأرقام 0105805657 - 0106832876 من أجل الحجز وتوفير أوتوبيسات للجميع
* من يستطيع القدوم بمساعدات مهما كان حجمها نرجوا إحضارها معه وسيتم إرفاقها بالأوتوبيس لتوصيلها للقطاع إن شاء الله
* عنوان نقابة الصحفيين بالقاهره : 3 شارع عبد الخالق ثروت ( المتفرع من شارع رمسيس) - منطقه الإسعاف - محطه مترو جمال عبد الناصر ( خلف دار القضاء العالي )
الأربعاء 10 رمضان - 10 سبتمتبر
الساعه 6 صباحا
أمام نقابة الصحفيين بالقاهره
قافله بإتجاه قطاع غزه المحاصر
للحجز والإستعلام والمعلومات
0105805657 - 0106832876
فاكس:0223623935

mostafa rayan يقول...

بصي يا ماماامولة
اولا كل سنةوانتي طيبة
اما بخصوص الناس اللي فتحتي لهم قلبكولاقتي معاملة غير متوقعة منهم فبقولك ولا تزعلى نفسك كليك يمين دليت عليهم
انسيهم من حياتك خالص
لكن بردة انا عايز اقولك ماينفعش انك تيجي على حساب اولادك وبيتك من اجل اصدقائك الأفتراضيون
يجب ان تكوةن الحياة الواقعية في المقام الأول
ثم بعدهاتأتي الحياة الأفتراضية هذه
لك كل تحياتي
وكل سنة وانتي طيبة مرة تانية

hager يقول...

بجد في اي حال من الاحوال انتي مش غلطانه
هوه في حد لاقي الزمان ده حد يوقف جمبه في محنته
ولاي سبب من الاسباب مينفعش نكران الجميل ابداا
يا رب ميكنش اول زياره لمدونتك تكون لاخر بوست هتكتبيه
تقبلي مروري

ماما أمولة يقول...

لاستاذ مصطفى ريان
بجد نورت المدونة وكل عام وانت بكل خير يارب
انا معاك في كل كلامك لكن المقصود من كلامي اني اعتبرتهم زي اهل بيتي خليتهم واقع ملموس وحسيت تجاهم بواجب مثل اولادي
لكن للاسف مقدروش
شكرااسعدني وجودك وردك

ماما أمولة يقول...

اهلا ياهاجر نورتي مدونتي

شكرا حبيبتي لشعورك الطيب

وان شاء الله مش ها تكون اخر رسالة

وسنتواصل باذن الله

وكل عام وانت بكل خير يارب

شموسة يقول...

ماما أمولة ....

كم حزنت من أجل حزنك،أحسستُ بكي يا أمي..
وأنا أعتذر نيابهَ عن كل من كانوا سبب ف حزنك ، وأرجو من الله أن لا تحزنى أبدا..

هذه زيارتى الأولى إليكي ،، ولكن إسمحيلي أن لا تكون الأخيرة.

كل سنه وانتى دايما بصحه وسلام..

الربان يقول...

تحياتي

لا تتوقفي رجاءً .... افعلي ما تفعليه
حبا لله و في الله....فقد تكون نصيحة منك
لها مفعول السحر في حياة شخص ما...و تعيده الي الطريق الصحيح...

سوف تشعري بحلاوة الحب في الله حين تسدي النصح لشخص ما ابتغاء وجه الله.

وفقك الله دائما...و لك كل التحية و التقدير.

ماما أمولة يقول...

شموسة الطيبة

جزاكي الله خيرا على رقة شعورك واحساسك الجميل
انا سعيدة بوجودك واتمنى ان اراكي دائما منورة مدونتي
وكل عام وانت بخير يارب

ماما أمولة يقول...

اخي الربان

اشكر لك مرورك الطيب

وتأكد انني لااستطيع ان اتخلى عن

ابنائي ابدا

كل عام وانت بخير اخي الفاضل

طارق الغنام يقول...

ماما اموله
مررت للتحيه والسلام ولرؤيه جديدك الذى انتظرة ولكى اشكرك على تواصلك معى بمدونتى المتواضعه
بارك الله فيكى
واعجبنى جدا القراءن الكريم بمدونتك
ربنا يجازيكى كل خير

ماما أمولة يقول...

ابن بلدي الغالي الاستاذ طارق الغنام

الله يسلمك يارب

ان شاء الله هاانزل بوست جديد قريبا

اشكر لك مرورك الكريم وياريت الكل

ياخد كود القرآن ويشغله بمدونته

ونتساوى في الاجر والخير ان شاء الله

تسنيم حسين يقول...

السلام عليكم
انا اى نعم لسه جديده فى عالم التدوين
ولكن احببتك من غير ان اراك....

فلا تحزنى واعلمى ان العمل لله لن يضيع حتى اذالم يشكرك احد على حسن صنيعك

وستلقين حسن الجزاء عند رحمان السماء

فى انتظار رسائل جديد

والسلام عليكم

عيله مفتريه سابقا يقول...

تعرفى يا امى

اعذرينى انا لسه اول مرة ادخل هنا بس انا حسيت انك امى

وعارفه
انا عمرى مقولت الكلمه لحد تانى غير امى
لانها والحمد لله نبع حنان
بعمل فيها ما بعمل
والله لو حكيتلك ما هيكفى

بس يا امى الجميله بتزعل شوية وقلبها بيصفى لوحده
حاجه عجيبه الامومه دى

اقولك بقى الجميل
انك احلى ام بورسعيديه - بعد امى - ههههه واقولك انا نفسى اكون زيكم قوىىى

امى بالله عليكى ادعيلى فى كل صلاة ان ربنا يفرج على ويشرح صدرى

سلامى ليكى يا اجمل ام

أكون او لا أكون يقول...

كيف حالك ماما أموله... أنا جيت وكلي أمل أني ألاقي بوست جديد مافيهوش زعل... بس لقيته هو هو ... لاولنا مستنيين شئ فرايحي...
مع السلامه

ABOALI يقول...

اولا رمضان كريم يا ست الكل
اول مرة اتصفح مدونتك وكلماتها الرقيقة المعبرة
وخصوصاعنوانها الزمن الجميل
شدنى العنوان ليس لاننا نتندر على ايام زمان ولكن لاننا دائما نستطيع صنع ماهو جميل دائما فنحن هم وهم نحن
اما موضوع رسالة الى ...
فاسمحى لى بسعة صدرك فيه فنحن نتبادل مع بعض معتركات الحياة
من يختار يوما ان يكون فارس لابد ان يتسلح دائما بلباس الفروسية حيث الاثيار وحب من حواليه مهما بادلوه من هفوات هو لا يرضى عنها
ان المشاعر النبيلة الصادقةالتى قد لا يدركها البعض او قولى الكثيرون لا تكون مبررا ابدا للبعد او الفراق لاننا اخترنا ان نكون نبلاء فالابد ان نغض البصر عن من لم يفهموا معنى الحياه جيدا
ولى عتاب رقيق يا ست الكل مهما كان حبك لمن تعرفيهم فحبك لفلذات اكبادك اشد امنحيهم ما تريدى ان تريه فى من حولك من كل شيىء جميل
ان كان كلامى فيه بعض الحصى
فعذرى ان الحصى تبنى جبال

رمضان كريم

ماما أمولة يقول...

اهلا بك يا تسنيم في عالم التدوين

اتمنى ان تنجحي وتكوني ان شاء الله في

المقدمة

اشكرك لزيارتك ولرقة مشاعرك

وكل عام وانت بكل خير

ماما أمولة يقول...

عيلة مش مفترية سابقا

الغالية شيماء

اشكر لك تواجدك العطر

وادعو الله لك ان يفرج كربك ويصلح حالك

وحال المسلمين

وكل عام وانت بخير من الله

ماما أمولة يقول...

لاخ الفاضل ابو علي

اشكر لك مرورك وتعليقك وحصاك

انا اعي جيدا ماوراء الحصى

جزاك الله خيرا اخي الكريم واتمنى الا

تنقطع زيارتك

وكل عام وانت بخير

ماما أمولة يقول...

اكون او لا اكون
ازيك يا حبيبتي انا بخير الحمد لله
لكني لا استطيع الكتابة في رمضان لقلة وقت الفراغ ولتواجدي القليل على النت
لكن ان شاء الله ساحضر بوست فرايحي يدخل السرور على كل احبائي لاسعدهم جميعا كما احزنتهم
شكرا على مرورك حبيبتي في الله
ربنا يصلح حالك يارب

انى احبكم فى الله يقول...

المدونه جميله والبوست جميل وعلى فكرة الموضوع جميل وتحياتى ليكى واقبلى مرورى

فراشة حزيران يقول...

ماما امولة .. متزعليش من حد .. لانه كل ابن ادم خطاء

واعتبريني وخدة من بناتك
وبتمنى تكون هاد اخرة مرة سامعف يها منكم الكلام جا



ممدونتك حلوة كثير




يا ريت تزوريني بمدونتي

اكيد حتنوريني \\\


بنت دعاء

ماما أمولة يقول...

اني احبكم في الله
احبك الله الذي احببتنا فيه
شكرا لمرورك حبيبتي
وكل عام وانت بكل خير من الله
سلامي

ماما أمولة يقول...

فراشة حزيران

ما اجمل مرور الفراشات

جزاكي الله خيرا لرقة شعورك

دمتي بكل الود