الخميس، أبريل 26، 2012

تهييسة أمولية







مين نفسه يـُنـُط الحبل
يطلع لفوق تتشنكل رجليه
يقع ويضحك من قلبه
مين نفسه يجري
على شط و رمل
وينام فارد دراعيه
باصص للسما 
والدنيا ماهي قده
مين نفسه يغني
ولا يبكيش
مين نفسه يبكي
ولا يشكيش
مين نفسه ينسى
مين نفسه يقسى
والخطاوي تتوه منه
 ولا يخطيش
مين نفسه يبقى خـَط
فوق السطر يتـْخـَط
مين نفسه يبقى كلمة
بميت كتاب وألف حكمة
من نفسه يبقى غيره
ما يعرف غطاه ولا بيره
مين نـِفـْسُه يعرف نـَفـْسُه
من غير مايتوه من نـَفـْسُه
مين غابت عنه مراسيه
مين نسى فين أراضيه
مين لما بيسرح بيتوه
وينسى كان بيقول إيه
مين لما ينام النوم يهرب منه
مين زي السجان
بيسجن جواه حلمه
مين زي الطوفان
مالوش حبيب
مين فينا بحر
ماهوش غويط
ليه الأخ مش
زي أخته بشوش
ليه الدم بقى
رايب ومغشوش
ليه بقينا مش إحنا
مانعرف حد وقت المحنة
ليه بقينا زي الموج محتارين
ليه بنختار غلط ونقول مجبرين
وليه وليه وليه
مش عارفين


http://youtu.be/XV7UgHpNyes
 

هناك 12 تعليقًا:

حزينه يقول...

انا نفسى ارجع تانى لورا لورا اوى

د.ريان يقول...

صباح النور أموله الراقية

وشعر رائع راق لي كثيراً وذكرني

بالشاعرة المصرية إيمان بكري في قصيدة حاجة

كم كان شعر رائع ومميز وحكيم

ومؤثر وعميق

دام ابداعكم سيدتي ودمتم بكل ود

أمل حمدي يقول...

حزينة

أسعد الله عمرك وبلغك ماتتمني

أمل حمدي يقول...

د.ريان

مساء النور يادكتور
تقديري لحضورك الراقي
وشكرا لتواصلك ولكلماتك الطيبة
دمت بخير

Tarkieb يقول...

هههههه مين جايب سيرتي...الاجابة انا ...لا طبعا بهيس زي ما سعادتك بتهيسي بس انا ماليش في نط الحبل....جميلة

أمل حمدي يقول...

Tarkieb

أجمل تهييس هو تهيسك يا تركيب
ليه ملكش في نط الحبل بس :)
حضورك الأجمل أكيد

الاحلام يقول...

هنا التمس اننى فى اام الزمن الجميل
هنا اشعر باننى احيا ايام الزمن الجميل
نعم امل فقد دخلتى بداخلنا جميعا بهذه الكلمات فاخرجتى ما بداخلنا فمن منا لم يكن شىء ممن كتبتيه
تحياتى الخالصه
ابوداود

شمس النهار يقول...

انا شبطانه في النص الاولاني

:))
ولو كل التهييس كده ياريت يااجمل امولة تهيسي كل يوم :)))

أمل حمدي يقول...

الأحلام
وسيظل الزمن جميلا بصجبتكم الطيبة
دمت بخير يا صاحب الأحلام

أمل حمدي يقول...

شموسة كل حاجة حلوة لك حبيبتي
ربنا يغمرك بالسعادة اللهم آمين

أحــوال الهـوي يقول...

رائعه دائما يا استاذه امل
في رومانسياتك و تهيساتك


دمتي مبدعة متالقه

اختفي حسابك ع الفيس لعل المانع خير


تحياتي

أمل حمدي يقول...

دكتور عصام
الروعة دوما ترافق حضورك الألق

غيابي لن يستمر طويلا
قفلت الصفحة مؤقتا وسأعود إن شاء الله
وأنا سأكون بمدونتي دوما إن شاء الله

تقديري لك دكتور عصام