رسمتك حبيبي
رسمتك بكل ألوان الكون
رسمتك قلب حنون
يضم ولا يْكِل
رسمتك حبيبي
بلون التلج
قلب أبيض زي الفل
رسمتك بلون السما
فيروز صافي العيون
على الجميع بتطل
رسمتك بلون البحر
يوم هادي
وألف يوم مجنون
رسمتك بلون الشجر
فارد أغصانك للضل
رسمتك بلون المطر
تروي العطاشى
ما تمل
رسمتك بألف لون ولون
رسمتك بلون الشمس بحس الهمس
رسمتك بلون الليل
وغنى المواويل
رسمتك النهارده وبكرة وأمس
رسمتك حلم جوة العيون
ورا الجفون مفتون
رسمتك زهرة بكل الألوان
أصفر بلون الغيرة
أحمر بلون الشوق
رسمتك عاشق ولهان
رسمتك قوس قزح بين المطر والشمس حيران
مادد إيديه بين الصفا والغيم
غرقان
رسمتك طريق
رسمتك صديق
رسمتك فرحان
رسمتك زعلان
رسمتك وراسك على كفة ايدي
نايم نعسان
رسمتك طفل في حضني
حاسس بأمان
رسمتك ورسمتك كتير
فراشة
في كل الأحلام
تطبطب عليه بحب وحنان
رسمتك سما رسمتك أرض
رسمتك طول رسمتك عرض
رسمتك هوى رسمتك نبض
رسمتك وطن رسمتك عَلـَم
رسمتك حِلـْم رسمتك عِلـْم
رسمتك بكل أشكال الكون
رسمتك بسمة رسمتك همسة
رسمتك ضيا في العيون
رسمتك بحب مالي القلب
يكفي كل الكون
رسمتك حبيبي
بقلم ماما أمولة
هناك 28 تعليقًا:
السلام عليكم
أللــــــــــــــــــه ... الله ينور عليكى ..
عارفه يا هانم .. الكلام حلو قوى قوى والواحد رجع بيه عشرات السنين للخلف
كمان الكلام ينفع يكون لأى شئ .. الرومانسيه ينفع ... لفلذات الاكباد .. ينفع .. للوطن اللى مطلع روح اللى خلفونا .. برضه ينفع
رسمتك حبيبى بكل حاجه حلوه فى الدنيا
اعتذر يا ستنا عن غيابى هذه الفتره لانى كنت بعيدا عن النت لفتره كبيره لانى كنت ما بين التل الكبير والبحيره والاسكندريه .. بعيد عنك عمل بين التلات بلاد دول
تحياتى
فشكووول باشا
يا ألف مرحب بيك منور الزمن الجميل
وصاحبة الزمن الجميل
أنا سعيدة إن الكلمات عجبتك
وفعلا هي بحرها واسع وتساع الحبيب والابن والوطن
ربنا يصلح حالك يارب يا فشكول
شكرا
الله عاللوحة دي يا أمولة الزمان الجميل
كلمات للحبيب وللوطن وللولد ووووووووو
كلمات بكل الألوان .....ربي يباركلنا في عمرك ويخليكي لكل أحبابك خصوصا حبيبتك بلوجر اللي وحشتيها خالث مالث
السلام عليكم
ما أعذب كلماتك وألوانك الساحرة سلمت الأنامل
هنا حيث شعار
نحن بدأنا من حيث انتهي خيال الاخرون
انا مش هنافقك ولا هكدب ولا اقول غير الحقيقه
والله الكلام ده من الجمال والفن والرسم بالكلمات كاروع ما يقال لالاطفال من ام من الامهات
ومبالك بقي لو كان من عمايل دماغ ماما اموله بذات نفسيتها
اكيد له طعم ولا اروع من كده
يسلم خيالك يا مبدعه
كلمات من نور
شكرا يا نورانية
ربنا يصلح حالك ويبارك في عمرك يارب
وأنت كمان وحشتيني بجد
أم الخــلـود
وعليكم السلام ورحمة الله وبركاته
لاتعلمي كم سعادتي لتواجدك الجميل بين كلماتي
أشكرك لردك الطيب
دمت بكل الخير يارب
هي وظروفها
ربنا يخليك يا وليد يارب
شكرا لكلماتك الطيبة التي أسعدتني
ربنا يصلح حالك ويبارك لك في عمرك
اللهم أمين
يا جمال الوانك و بلاغة فرشاتك يا استاذه امل
كلمات جميلة اختلطت بها الصور و المعاني
و احاسيس مبهجه ابدعتي برسمها بلوحة سوف نعلقها علي ابواب المحبين
تحياتي
أحــوال الهـوي
أشكرك يا أستاذ عصام
ربنا يبارك في حضرتك يارب
الله الله الله
الله على رسمك والوانك وحروفك وخيالك
ربنا يكرمك يا ماما اموله
ومايقصفلك قلم ابدا
تحياتى للرسم الرائعه وصاحبه الرسم الجميله
richardCatheart
تسلميلي يارب ويسلملي مرورك الجميل
وكلامك الجميل
شكرا لك حبيبة قلبي
دمت بود
إزيكم .... كيفنكم أنا لي زمان ما شفتكم. .. يارب تكوني بخير.والله لما باجي هنا اكني شميت ريحة مصر...ظروف شغل بقى قطعتني عن كله.. بس ايه الكلام الجميل ده .. يا بخته بقى ياستي المرسوم ده دا باين عليه قمر وحليوة وطيب كدة زي حالاتي .بس تصدقي انه الصورة المرسومة دي تحسي انها بقى فولة واتقسمت مني..سبحان الله بقى معا اختلافات بسيطة(مش اوووي يعني) هو لولا بس العين الزرقا كنت جيت اخدت الصورة بقى وقلت انا اهو..أنا مش عارف ايه ياستي حبكوا للعين الزرقا ليه كدة ؟.ده حتى بيبان فيها اي حاجة بسرعة مش زي العين السودة حاجة بقى جميلة وغسيل ومكوى ,واووعي يكون شعره اصفر تبقى حوسة بقى,كل سنة وانت طيبة ومبروك ع النيو لوك للبلوج وربنا يخلي ليكي ابو عين زرقا يا ستي .....ومستنين صور تانية
Tarkieb
أهلا أهلا أهلا
حلوة الاغنية دي بحبها
الحمد لله أنا بخير يارب تكون بخير أنت كمان
ابو عيون زرقا دا في الخيال يا تركيب
وما فيش أحلى ولا أجمل من عيونا السوداء
دا بس لون علشان اللوحة تطلع ملونة
نورت يا تركيب
وحمد الله على سلامتك
ربنا معاك
تري هل يأتي يوما يصبح فيه الحب عقيده باقة ورد او قصيده ؟؟؟؟؟؟؟؟؟؟؟؟؟؟؟
م/ الحسيني لزومي
نعم هو باقة ورد وقصيدة
تقديري
أخيرا عرفت أدخل هنا لأعلق
بعد محاولات أيام
أ / أحمد عبد المنعم
نورت المدونة
ولا أعلم ما العيب الشكوى المتكررة من عدم فتح التعليقات
الله المستعان
شكرا لمرورك الطيب يا أستاذ أحمد
مش انا بس التعبان من التعليقات فيه غيري والحمد لله ...اكثر من 10مرات اكتب التعليق و يضيع ...جميل جميل الزمن الجميل ...الله الله ماما اموله .
فركشاوي ..ناوي
حقك عليه يا فركشاوي والله ماعارفة السبب وغيرت الاستايل أكتر من مرة وما فيش فايدة
شكل الزمن الجميل اتحسد ولا ايه
شكرا يا فركشاوي
ربنا يبارك فيك يارب
رسمتك بلون البحر
يوم هادي
وألف يوم مجنون
هو دا الكلام
تسلم ايدك ياماما اموله
بجد البوست تحفه
beautiful mind
الله يسلمك يارب
شكرا على ردك الطيب
ربنا يصلح حالك يارب
سيدو بيحيكى على الكلام الجميل ده ونحن سعداء بوجودك فى منتدى مصر
سيدو بيحيكى على الكلام الجميل ده ونحن سعداء بوجودك فى منتدى مصر
شكرا يا سعيد
نورت الزمن الجميل
وأنا اللي بحييك على مرورك الجميل
كل التقدير
رائعة من رائعة
شكرا لك كثيرا على هذا الجمال
دمت مبدعة
أ / عماد
شرفت مدونتي المتواضعة بمرورك الأروع
كل التقدير لحضرتك
إرسال تعليق