تهييسة أمولية

مين نفسه يـُنـُط الحبل
يطلع لفوق تتشنكل رجليه
يقع ويضحك من قلبه
مين نفسه يجري
على شط و رمل
وينام فارد دراعيه
باصص للسما 
والدنيا ماهي قده
مين نفسه يغني
ولا يبكيش
مين نفسه يبكي
ولا يشكيش
مين نفسه ينسى
مين نفسه يقسى
والخطاوي تتوه منه
 ولا يخطيش
مين نفسه يبقى خـَط
فوق السطر يتـْخـَط
مين نفسه يبقى كلمة
بميت كتاب وألف حكمة
من نفسه يبقى غيره
ما يعرف غطاه ولا بيره
مين نـِفـْسُه يعرف نـَفـْسُه
من غير مايتوه من نـَفـْسُه
مين غابت عنه مراسيه
مين نسى فين أراضيه
مين لما بيسرح بيتوه
وينسى كان بيقول إيه
مين لما ينام النوم يهرب منه
مين زي السجان
بيسجن جواه حلمه
مين زي الطوفان
مالوش حبيب
مين فينا بحر
ماهوش غويط
ليه الأخ مش
زي أخته بشوش
ليه الدم بقى
رايب ومغشوش
ليه بقينا مش إحنا
مانعرف حد وقت المحنة
ليه بقينا زي الموج محتارين
ليه بنختار غلط ونقول مجبرين
وليه وليه وليه
مش عارفين


http://youtu.be/XV7UgHpNyes 

من غير عنوان ..........

خليط بين الفصحى والعامية خدوها زي ماهي

مش شعر ولا نثر 

بس وجع ....

************

مجنونة

تمد الخـُطى

و كتير تـِهـَدي

ساكتة

وساعات

بالكلمات تـِعـَدي

مجنونة

بتهرب من نفسها

تدفن جوة بير الضلوع

أوجاعها

و تسافر بشراع أحلامها

تنسى المكان و الزمان

تقيد الشموع لأوجاعها

مجنونة

ترسم ابتسامة بايدها

وتداري الحزن الموشوم بإيد غيرها

حزينة قوي فرحانة قوي

عجوزة طفلة

زي ما هي

الكل حابينها

لكن مجنونة

عايزة تصرخ

ومحدش يسمعها

عايزة تجري

على شطوط ماتمنعها

عايزة رملة وشمسة

وشوية بحر لوحدها

تبكي ماحد يشوف الدمع على خدها

تقسى بس على نفسها

تضحك بس على نفسها

لا حد يكدب ولا حد يعتب

مش عايزة حد غير نفسها

بس ياريت ترجع لها

مجنونة

وهربانة منها زي كتير قوي حواليها

عاملين نفسهم أعقل منها

وكل نفس أدرى ببلاويها

ضاق الخناق على روحها وبتقاوح

قاسية وعاملة نفسها بتسامح

بتحب قوي

لكن متعرفش تكره

مجنونة 

سامعين ؟؟؟

شششششششششششش

صوت الشتا سامعااه

سامعين ؟؟؟

شششششششششششش

بيغسل القلوب ويحيي الحنين

سامعين ؟؟؟

ششششششششششششش

بيعزف اللحن على أوتار القلب الحزين

سامعين ؟؟؟

ششششششششششششش

بيناجي الشجر يصحي الزهر

ويسقي أرض الطيبين 

سامعين ؟؟؟

ششششششششششششش

بيحكي حكاوي اللقا

ويفتن على العاشقين

سامعين ؟؟؟

ششششششششششششش

ياليل ياللي جمعتنا تحت الشتا

فين القمر غايم مش شايفاه 

إمتى السما تصفا 

وتجمعني بحبيبي اللي بتمناه

شششششششششششش

ششششششششش

سامعين :) ؟؟؟

مزاجنجي

مزاجنجي

والبنات عنده فـَرْط

رخيصة متساويش

والبـِت المـُزة غالية

زي حـِتـّة الحشيش

يلفها ف سيجارة

ويـِوَنـْوِن هـُوب متلاقيش

لـِسـْتـَة وكل يوم حُط خَط

دي خلاص بقت بقشيش

ولما يعشق يا عيني عليه

برنس ولا كده مافيش

لـِسـَّاتـُه عايش في زمن

سي السيد والدراويش

له كل يوم سـِهـْراية

دايما بايع ميشتريش

مزاجنجي

لعبته اتكسرت

من غير دموع بكى

ولا صوته عِلـَى

ولا راح اشتكى

لكن لـَمـَّها بشويش

مزاجنجي

ودايما طاير زي العصفور

بس من غير ريش

فاكرينه يا عيني سعيد

وهو أغلب من كدا

متلاقيش

مزاجنجي

وملازمه اللقب

زي ناس كتير حواليه

دا عاطل ودا مالوش غير ف

البهرجة والحلمنتيش

ولو شاف قدامه خيال

يجري أصله فاكره شاويش

مزاجنجي وغلبان

الدنيا لعبت بيه

أخدت منه أصلها مبتديش

فاكر إنه بالمزاج هينسى

أتاريها زودت ألمه ومراره

لحد ما استجار

كفاية متحطميش

مزاجنجي ونادم

نفسه ترجع له دماغه

 كفاية متلعبيش

خلينا مرة نفوق

من غير أنفاس

ولا تشيش

مزاجنجي و فاق

حاول يعمل بينه

وبين نفسه وِفاق

قالته استنيتك كتير علشان

تيجي مبتجيش

يلا حـُط دماغك ف راسك

وتعالى نبني دا أنت من زمان

بتهد مبتبنيش

مزاجنجي وكان

الاسم له عنوان

دلوقت خلاص اتصلح الحال

وبقى ولا كدا مافيش

مزاجنجي ؟؟؟

لأ خلاص

تاب بجد وبإخلاص

بقى إنسان فعال

نسى التهميش

سؤال مالوش لازمة ؟؟؟

هي السعادة بتتشرى
ولا إيه
ولا لسه مجاش أوانها
ولا جفت على أغصانها
ولا راح زمانها
مدورش عليه
خايفة يسكني الحزن تاني
أدور على أمل ما ألقاني
ولا أنسى
ولا أعمل إيه
عارفة إنه سؤال صعب
ميتجاوبش عليه
وأنا بسأل
ولازمة سؤالي إيه
لكن أنا عارفة جوابه
وعارفة سكته وبابه
وعارفة كلمة السر إيه
يارب