الأربعاء، سبتمبر 29، 2010

ادعيلي يا أمي






محتارة ليه يا أمي
ها تشيلي هم 
مين ولا مين
ارتاحي بقى 
كفاية عليكِ
حِمْل السنين
يا أمي دا مكتوب علينا
مكتوب على الجبين
لا دمعك ها يزيحه 
ولا تقدري تغيري منه
سطرين
 
 ضميني يا أمي
في صدرك
وادعيلي
وأنا ها أقول وراكي 
أمين
ضَمتك يا أمي 
ودعوتك بتقويني
وتصبرني مهما قـَست
عليَّه السنين
يا أمي طبْطبي
على ظهري اللي انـْقسم 
من الحِمل
اللي على اكتافي
اتـْقسم
وطـَيِّبي بخاطري 
ومَلـِّسي على شعري
وغنيلي غنوتي 
وأنا صغيرة
أنا عندي بنت
زي السـُّكـَرة
فاكراها يا أمي
غنيهالي مرتين 
 سامحيني يا  أمي 
كان نفسي
أفرَّح قلبك الحزين
وأبدد كل لِيلِك
وأنورلك بدل القمر
قمرين
 وألبسك من الشمس 
طرحة
وأمْلـَى عيونك فرحة
وأغنيلك أنا 
ياصلاة الزين
على ست الحلوين
سامحيني يا أمي
والله كان نفسي
سامحيني
و
ادعيلي



ماما أمولة

الاثنين، سبتمبر 20، 2010

كفاية كلام عن الحب


 


بيقولوا كفاية كلام عن الحب

كفاية كلام عن الهجر والفراق

والشوق والبعد والقرب

خلينا بقى نتكلم جد

نكتب بس عن الحرب

عن الغلاء عن الفساد

عن الغُلب

نموت مشاعرنا

نجمد احاسسنا

نعمل اعتصام نشد الحزام

بكدا هانحل المشاكل

واللي نايم جعان

هايقوم الصبح آكل

وكمان هاترجع الكهربا

وهايتفك الحصار

وهايرخص كمان الخضار

لو بطلنا كلام عن الحب

الدنيا ها تزهزه

والورد هايفتح

ومشاكلنا كلها ها تتحل

أصل الكلمتين الحلوين

بينسوا الناس همومها

وإحنا ننسيهم ليه

خليهم فاكرين

نايمين صاحيين متنكدين

طيب الحل إيه

نموت مرتين

مرة باحساسنا

ومرة بهمومنا

معقول ياناس

في ناس جامدة

زي الحجر

عايزة تقتل جوانا الاحساس

نفضل شايلين همومنا

ونعيش دنيا ما تنداس

فيها الحب بقى غريب

والضحكة شيء مريب

والنكد دا مكتوب وقدر

هم دول يا ناس بشر

وأنا

مش ها أسمع كلامهم

وها أعمل مش واخدة بالي منهم

وها أكتب وأكتب

واللي يقول خليه يقول
ماما أمولة



الجمعة، سبتمبر 17، 2010

رباعية







 فاااااااض الكيل واتدلدق ومتقولش ليه
عمر المغشوش مايعتق قلة الأصل فيه
بياعين الصبر جبروا قفلوا أبوابهم لييه
قالوا اللي اتعوج ماعاد دوا .. يشـ  فيه

وعجبي

الاثنين، سبتمبر 13، 2010

ابعد






 ابعد
خليك مكانك 
كفاني جراح 
ابعد ما صدقت قلبي
شوية ارتاح 

   

  اتمنيتك أيوة اتمنيتك 
ما خدت منك يوم 
الفرح 
حبيتك أكتر من روحي 
ما لقيت منك غير
  الجرح 

 

جرحتني وقسيت 
  داويت جرحي 
وعملت نفسي نسيت
  جاي بعد إيه 
وراجع 
صحيت في قلبي
  المواجع  
خلتني والله بكيت 
  ما أعرف من الفرحة 
ولا فيك اتشفيت 
خليك بعيد

   

كان نفسي أخدك في حضني 
وأحس يوم بهوايا 
خفت تبعد تاني 
  ما أنول غير أسايا 

   

ابعد خليك مكانك
  من كتر شوقي ليك
  حرمت أجري عليك 
  خليك بعيد
  لا عايزة أعرف 
  ليه بعدت 
  ولا عايزة أعرف 
  ليه جيت 
خليك بعيد

   

  ماما أمولة




الأربعاء، سبتمبر 08، 2010

عيدكم سعيد















كل الحب لأحبتي في الله
 تقبل الله منا ومنكم
أعاده الله عليكم بالخير 
اللهم امين

عيد سعيد