محتارة ليه يا أمي
ها تشيلي هم
مين ولا مين
ارتاحي بقى
كفاية عليكِ
حِمْل السنين
يا أمي دا مكتوب علينا
مكتوب على الجبين
لا دمعك ها يزيحه
ولا تقدري تغيري منه
سطرين
ضميني يا أمي
في صدرك
وادعيلي
وأنا ها أقول وراكي
أمين
ضَمتك يا أمي
ودعوتك بتقويني
وتصبرني مهما قـَست
عليَّه السنين
يا أمي طبْطبي
على ظهري اللي انـْقسم
من الحِمل
اللي على اكتافي
اتـْقسم
وطـَيِّبي بخاطري
ومَلـِّسي على شعري
وغنيلي غنوتي
وأنا صغيرة
أنا عندي بنت
زي السـُّكـَرة
فاكراها يا أمي
غنيهالي مرتين
سامحيني يا أمي
كان نفسي
أفرَّح قلبك الحزين
وأبدد كل لِيلِك
وأنورلك بدل القمر
قمرين
وألبسك من الشمس
طرحة
وأمْلـَى عيونك فرحة
وأغنيلك أنا
ياصلاة الزين
على ست الحلوين
سامحيني يا أمي
والله كان نفسي
والله كان نفسي
سامحيني
و
ادعيلي
ماما أمولة